IPL 2025 Update : હવે IPL માટે મેદાન ખુલ્લું, BCCI ટૂંક સમયમાં જાહેર કરશે નવી તારીખો

IPL 2025 Update : ભારત અને પાકિસ્તાન વચ્ચે યુદ્ધવિરામની જાહેરાત કરવામાં આવી છે. યુએસ રાષ્ટ્રપતિ ડોનાલ્ડ ટ્રમ્પની પોસ્ટ પછી આ વાતની પુષ્ટિ થઈ. આવી સ્થિતિમાં, ભારતીય ક્રિકેટ કંટ્રોલ બોર્ડ (BCCI) ટૂંક સમયમાં IPL 2025 ફરી શરૂ કરવા અંગે સત્તાવાર જાહેરાત કરી શકે છે.

તાજેતરમાં ભારત અને પાકિસ્તાન વચ્ચે વધતા તણાવને કારણે, શુક્રવારે IPL એક અઠવાડિયા માટે સ્થગિત કરવામાં આવી હતી. જોકે, આ ટુર્નામેન્ટ ફરી ક્યારે શરૂ થશે તે અંગે નિર્ણય લેવાયો નથી. પરંતુ હવે તાજેતરની પરિસ્થિતિ પછી, એવું મનાઈ રહ્યું છે કે BCCI ટૂંક સમયમાં આ અંગે કેટલીક માર્ગદર્શિકા જારી કરી શકે છે.

અત્યાર સુધીમાં 57 મેચ રમાઈ, 58મી મેચ અધવચ્ચે જ રોકી દેવામાં આવી હતી

IPL 2025માં કુલ 57 મેચ રમાઈ હતી. 8 મેના રોજ ધર્મશાલામાં પંજાબ કિંગ્સ (PBKS) અને દિલ્હી કેપિટલ્સ (DC) વચ્ચે 58મી મેચ રમાઈ રહી હતી, પરંતુ તેને માત્ર 10.1 ઓવર પછી રોકી દેવામાં આવી હતી. આ મેચ ફરી રમાશે કે નહીં તે હજુ નક્કી થયું નથી. 8 મેના રોજ જ્યારે મેચ બંધ કરવામાં આવી ત્યારે પંજાબ કિંગ્સે 10.1 ઓવરમાં 1 વિકેટ ગુમાવીને 122 રન બનાવ્યા હતા. પ્રિયાંશ આર્યએ 34 બોલમાં 5 ચોગ્ગા અને 6 છગ્ગાની મદદથી 70 રન બનાવ્યા. પ્રભસિમરન સિંહ 28 બોલમાં 50 રન અને શ્રેયસ ઐયર 0 રન બનાવી અણનમ રહ્યા.

હવે લીગ સ્ટેજમાં ફક્ત 12 મેચ બાકી છે, ત્યારબાદ 4 પ્લેઓફ મેચ રમાશે. અગાઉના શેડ્યૂલ મુજબ, ક્વોલિફાયર 1 અને એલિમિનેટર હૈદરાબાદમાં યોજાવાની હતી, જ્યારે ક્વોલિફાયર 2 અને ફાઇનલ કોલકાતામાં યોજાવાની હતી.