Odisha Weather Report: ଲଘୁଚାପ ପ୍ରଭାବ, ଏହିସବୁ ଜିଲ୍ଲାରେ ବିଜୁଳି ଘଡ଼ଘଡ଼ି ସହ ଛେଚିବ ବର୍ଷା

ବଙ୍ଗୋପସାଗରରେ ପୁଣି ଏକ ଲଘୁଚାପ ସୃଷ୍ଟି ହୋଇଛି। ଉତ୍ତର ବଙ୍ଗୋପସାଗରରେ ସୃଷ୍ଟି ହୋଇଥିବା ଘୂର୍ଣ୍ଣିବଳୟ ଗୁରୁବାର ସକାଳେ ଲଘୁଚାପରେ ପରିଣତ ହୋଇଛି।  ଆଗାମୀ ୨୪ ଘଣ୍ଟାରେ ଏହା ଅଧିକ ଘନୀଭୂତ ହେବା ସହ ଆସନ୍ତା ୪୮ ଘଣ୍ଟାରେ ଏହା ପଶ୍ଚିମ-ଉତ୍ତର ପଶ୍ଚିମ ଦିଗରେ ଉତ୍ତର ଓଡ଼ିଶା ଏବଂ ସଂଲଗ୍ନ ପଶ୍ଚିମବଙ୍ଗ ଉପକୂଳ ଆଡ଼କୁ  ଗତି କରିବ।

ପ୍ରଭାବରେ ଉତ୍ତର ଓଡ଼ିଶାକୁ  ଶୁକ୍ରବାର  ପ୍ରବଳରୁ ଅତି ପ୍ରବଳ ବର୍ଷା ନେଇ ରେଡ୍ ଓ୍ବାର୍ଣ୍ଣିଂ ଜାରି ହୋଇଥିବା ବେଳେ ଲଘୁଚାପ ପ୍ରଭାବରେ  ରାଜ୍ୟକୁ  ଅତି ପ୍ରବଳ ବର୍ଷା ନେଇ  ସତର୍କତା ଥିବା ଆଞ୍ଚଳିକ ପାଣିପାଗ କେନ୍ଦ୍ର ନିର୍ଦ୍ଦେଶକ ମନୋରମା ମହାନ୍ତି କହିଛନ୍ତି। 

ଗୁରୁବାର ଦିନ ରାଜ୍ୟରେ ପ୍ରବଳ ବର୍ଷା ହୋଇଛି। ବର୍ଷା ସମୟରେ ଓଡ଼ିଶା , ବାଲାଂଦେଶ  ଓ ପଶ୍ଚିମବଙ୍ଗ ଉପକୂଳରେ  ୪୦ ରୁ ୫୦ କିମି ବେଗରେ ପବନ ବହିବାରୁ ସମୁଦ୍ର ଅଶାନ୍ତ ରହିଛି। ତେଣୁ ୨୮ ତାରିଖ ପର୍ଯ୍ୟନ୍ତ ମତ୍ସ୍ୟଜୀବୀଙ୍କୁ ସମୁଦ୍ରକୁ ବାରଣ କରାଯାଇଛି।

ଆଜି (ଶୁକ୍ରବାର) ବିଶେଷକରି, ମୟୂରଭଂଜ, କେନ୍ଦୁଝରରେ ପ୍ରବଳ ବର୍ଷା ସହ ଘଡ଼ଘଡ଼ି ନେଇ ରେଡ଼୍ ଆଲର୍ଟ ଜାରି ହୋଇଛି। ଏହା ବାଦ୍ ବାଲେଶ୍ବର, ଭଦ୍ରକ, ଯାଜପୁର,  ଝାରସୁଗୁଡା, ଢେଙ୍କାନାଳ, ବରଗଡ଼, ସମ୍ବଲପୁର, ଦେବଗଡ , ଅନୁଗୁଳ ଓ ସୁନ୍ଦରଗଡ଼ ଜିଲ୍ଲାକୁ ଅରେଞ୍ଜ ଆଲର୍ଟ ଜାରିହୋଇଥିବା ବେଳେ ବାକି ୧୮ ଜିଲ୍ଲାକୁ ୟେଲୋ ଆଲର୍ଟ ଜାରି ହୋଇଛି। 

ବର୍ଷା ସମୟରେ ପବନର ବେଗ ଘଣ୍ଟାପ୍ରତି ୩୦ ରୁ ୪୦ କିମି ଯାଏଁ ରହିବ ବୋଲି ଆଞ୍ଚଳିକ ପାଣିପାଗ କେନ୍ଦ୍ର ପୂର୍ବାନୁମାନ କରିଛି।