ઓગસ્ટમાં બની રહેલ વૈશ્વિક લેવલની હવામાન સિસ્ટમ કરશે જળબંબાકાર! અંબાલાલે કરી વરસાદની ખતરનાક આગાહી

હવામાન વિભાગના જણાવ્યા મુજબ, આગામી 5 દિવસ રાજ્યના અનેક ભાગોમાં ગાજવીજ સાથે હળવોથી મધ્યમ વરસાદ પડી શકે છે, પરંતુ તે ભારે વરસાદ નહીં હોય. આ આગાહીથી સ્પષ્ટ થાય છે કે, ગુજરાતમાં આગામી બે અઠવાડિયા સુધી વરસાદનું જોર ધીમું રહેશે. 

જાણીતા હવામાન નિષ્ણાત અંબાલાલ પટેલે 1થી 3 ઓગસ્ટ દરમિયાન રાજ્યના વિવિધ વિસ્તારોમાં ભારે વરસાદની આગાહી કરી છે. ખાસ કરીને દક્ષિણ ગુજરાત અને સૌરાષ્ટ્રના કેટલાક ભાગોમાં ભારે વરસાદનો ખતરો છે. 6થી 10 ઓગસ્ટ દરમિયાન સૌરાષ્ટ્ર, મધ્ય અને દક્ષિણ ગુજરાતમાં સામાન્ય વરસાદની શક્યતા છે. પરંતુ ચોંકાવનારી આગાહી એ છે કે ઓગસ્ટના અંતિમ સપ્તાહમાં વૈશ્વિક સ્તરની હવામાન સિસ્ટમ બનવાની શક્યતા છે. 

અંબાલાલ પટેલે ઓગસ્ટના અંતિમ સપ્તાહમાં વૈશ્વિક લેવલની હવામાન સિસ્ટમ બનવાની આગાહી કરી છે. આના કારણે મુંબઈ અને મહારાષ્ટ્રમાં ભારે વરસાદની સાથે સૌરાષ્ટ્રના કેટલાક ભાગોમાં પૂરની શક્યતા જોવાઈ રહી છે. 

હવામાન નિષ્ણાત પરેશ ગોસ્વામીએ જણાવ્યું કે, બંગાળની ખાડીની સિસ્ટમના કારણે ઉત્તર ગુજરાત અને મધ્ય ગુજરાતમાં સારો વરસાદ જોવા મળ્યો, પરંતુ કચ્છ અને સૌરાષ્ટ્રમાં ખાસ વરસાદ જોવા મળ્યો નથી. હવે આ સિસ્ટમ આપણાથી દૂર જઈ રહી છે અને નબળી પણ પડી રહી છે. 

હવામાન નિષ્ણાત પરેશ ગોસ્વામીએ ઓગસ્ટ મહિનામાં કેવો વરસાદ પડશે તે અંગેનું અનુમાન કર્યુ છે. જેમાં તેમણે જણાવ્યું છે કે, આ બે દિવસ ઉત્તર ગુજરાત, મધ્ય ગુજરાત અને મધ્ય પ્રદેશ બોર્ડર લાગુ વિસ્તારમાં વરસાદ જોવા મળશે. ત્યાર બાદ 2 ઓગસ્ટ સુધી હળવા ઝાપટા જોવા મળશે. જુલાઈ મહિનાની જેમ ઓગસ્ટમાં પણ સારો વરસાદ વરસશે. ઓગસ્ટ મહિનો તો સારો રહેશે અને સપ્ટેમ્બર મહિનો પણ ખૂબ સારો રહે તેવું અનુમાન છે. 

ઓગસ્ટમાં 17થી 20 તારીખ સુધી સારો વરસાદ પડશે અને આ મહિનાના છેલ્લા અઠવાડિયામાં સારો વરસાદ રહેશે. ઉત્તર ગુજરાત, મધ્ય ગુજરાત, સૌરાષ્ટ્ર-કચ્છ અને દક્ષિણ ગુજરાતનો સમાવેશ કરવામાં આવ્યો છે. વરસાદની સાથે-સાથે ભારે પવન પણ ફૂંકાઈ શકે છે. 15 સપ્ટેમ્બર સુધી ગરમી અને બફારાની સ્થિતિ સામાન્ય રહેશે પરંતુ 15 સપ્ટેમ્બર સુધીમાં ગરમી અને ઉકળાટનું પ્રમાણ વધશે.

6થી લઈ 10 ઓગસ્ટ સુધી વરાપનો માહોલ જોવા મળશે. આ દિવસો દરમિયાન ખેડૂતોએ જો ખેતીકાર્યો થઈ શકે તેમ હોય તો વહેલીતકે પૂર્ણ કરવા જોઈએ. બાદમાં 10 ઓગસ્ટના રોજ બંગાળની ખાડીમાં લો પ્રેસર બનશે. જો ફરી વરસાદી રાઉન્ડ આવે તો આ કાર્યો અધૂરા રહી શકે છે. આ વરસાદી સિસ્ટમ 10 ઓગસ્ટના બંગાળની ખાડીમાં બનશે, ત્યારબાદ તેમનો ટ્રેક નક્કી થયા બાદ આગળના વરસાદના રાઉન્ડ વિશે ચોક્કસ જાણકારી મળી શકે છે. જો કે, ખેતકાર્યો સમયસર પુરા કરવા ખેડૂતોને અપીલ કરાઈ હતી.