બેન્ક FDના વ્યાજથી વધારે મળશે અહીં FD કરવા પર રિટર્ન, કોર્પોરેટ લોકો છાપે છે મોટો નફો!

જો તમે બેન્ક એફડીમાં રોકાણ કરી રહ્યા છો અને સુરક્ષિત વળતર શોધી રહ્યા છો, તો કોર્પોરેટ એફડી તમારા માટે શ્રેષ્ઠ વિકલ્પ બની શકે છે. હાલમાં દેશની સૌથી મોટી સરકારી બેન્ક SBI મહત્તમ 6.5% સુધી વ્યાજ આપી રહી છે. બીજી તરફ કેટલીક કોર્પોરેટ એફડી સ્કીમમાં 8.80% સુધી વાર્ષિક વ્યાજ ઓફર કરે છે, જે બેન્ક એફડી કરતા વધુ સારું વળતર આપે છે.

કોર્પોરેટ એફડી એક પ્રકારની ટર્મ ડિપોઝિટ હોય છે, જેમાં નોન-બેન્કિંગ નાણાકીય સંસ્થાઓ (NBFC) અથવા હાઉસિંગ ફાઇનાન્સ કંપનીઓ દ્વારા મૂડી એકત્ર કરવા માટે જારી કરાયેલ મુદતની થાપણનો એક પ્રકાર છે. આમાં રોકાણ પર નિશ્ચિત દરે વ્યાજ મળે છે, જેમ કે બેન્ક એફડીના કિસ્સામાં હોય છે. ફરક માત્ર એટલો છે કે, આ ડિપોઝીટ બેન્કમાં નહીં પરંતુ કંપનીમાં કરવામાં આવે છે.

હાલમાં શ્રીરામ ફાઇનાન્સની FD માર્કેટમાં સૌથી વધુ વ્યાજ આપી રહી છે. કંપની 1 થી 5 વર્ષના સમયગાળા માટે 7.59% થી 8.80% સુધી વાર્ષિક વ્યાજ ઓફર કરી રહી છે. વરિષ્ઠ નાગરિકોને પણ 0.5% વધારાનું વ્યાજ મળી રહ્યું છે અને મહિલાઓને 0.1% વધારાનું વ્યાજ મળી રહ્યું છે. એટલે કે વરિષ્ઠ નાગરિક 5 વર્ષની FD પર 9.45% સુધીનું વળતર મેળવી શકે છે.

આ સિવાય LIC હાઉસિંગ ફાઇનાન્સ 6.80% થી 7.50% વ્યાજ આપી રહ્યું છે, PNB હાઉસિંગ ફાઇનાન્સ 6.79% થી 7.70% અને ICICI હોમ ફાઇનાન્સ 6.80% થી 7.60% વ્યાજ આપી રહ્યું છે. જ્યારે SBI FD પર આ દરો માત્ર 3.50% થી 7.00% ની વચ્ચે છે.

જો કે, કોર્પોરેટ એફડી પરનું રિટર્ન બેન્ક એફડી કરતાં વધુ હોવા છતાં, તે થોડું વધારે જોખમ પણ ધરાવે છે. કારણ કે આ થાપણો એવી કંપનીઓમાં કરવામાં આવે છે જેમનું ક્રેડિટ રેટિંગ પર રિટર્ન નક્કી કરે છે. તેથી, રોકાણ કરતા પહેલા કંપનીની ક્રેડિટ રેટિંગ ચોક્કસપણે તપાસો.