કેદારનાથ જવું બનશે સરળ, દરેક મોસમમાં થશે બાબાના દર્શન; 9 કલાકની મુસાફરી માત્ર 36 મિનિટમાં!

જરા વિચારો કે જો દરેક સિઝનમાં કેદારનાથ ધામની મુલાકાત લઈ શકાય તો કેટલું સારું રહેશે. હાલમાં બાબાના દરવાજા થોડા મહિનાઓ માટે જ ખુલ્લા છે અને આ દરમિયાન હજારો ભક્તો અહીં દર્શન કરવા આવે છે. દુર્ગમ રસ્તાઓને કારણે ઘણા લોકો સ્વાસ્થ્ય સંબંધિત સમસ્યાઓનો ભોગ બને છે અને તેમાં ઘણો સમય પણ લાગે છે. પરંતુ, આ તમામ સમસ્યાઓનો અંત લાવવા માટે મોદી સરકારે એક મોટી યોજના તૈયાર કરી છે. કેન્દ્ર સરકારે પણ બુધવાર 5 માર્ચે આ પ્રોજેક્ટ માટે સંમતિ આપી દીધી છે.

સરકારે જણાવ્યું કે, મુસાફરોની સુવિધામાં વધારો કરવા અને બાબા કેદારનાથ ધામ સુધી મુશ્કેલ માર્ગોને બદલે સરળતાથી પહોંચી શકાય તે માટે રોપ-વે પ્રોજેક્ટ પર ટૂંક સમયમાં કામ શરૂ થશે. સોનપ્રયાગથી કેદારનાથ ધામ સુધી રોપ-વે બનાવવામાં આવશે. આ સાથે પગપાળા મુસાફરી કરવા માટે લાગતો સમય 9 કલાકથી ઘટીને માત્ર 36 મિનિટ થઈ જશે. સરકારે પ્રોજેક્ટ માટે રૂ. 4,081 કરોડ મંજૂર કર્યા છે.

હાલમાં સોનપ્રયાગથી કેદાનાથ ધામ જવા માટે મુસાફરોને 21 કિલોમીટરનું અંતર કાપવું પડે છે, જેમાં 8 થી 9 કલાકનો સમય લાગે છે. આ આખો રસ્તો દુર્ગમ પહાડોમાંથી પસાર થાય છે અને તે ખૂબ જોખમી પણ છે. સરકાર 12.9 કિલોમીટરનો રોપ-વે બનાવી રહી છે, જેનાથી અંતર ઘટીને અડધુ થઈ જશે અને મુસાફરી પૂરી કરવામાં માત્ર 36 મિનિટનો સમય લાગશે. આ પ્રોજેક્ટ નેશનલ રોપ-વે ડેવલપમેન્ટ પ્રોગ્રામ હેઠળ પૂર્ણ કરવામાં આવશે. કેન્દ્રીય મંત્રી અશ્વિની વૈષ્ણવે કહ્યું કે, આ પ્રોજેક્ટ પૂરો થયા બાદ ચાર ધામ યાત્રીઓને મોટી રાહત મળશે.

મોદી સરકારે કેદારનાથ ધામની સાથે જ હેમકુંડ સાહિબ સુધી સરળતાથી પહોંચવા માટે રોપ-વે પ્રોજેક્ટને મંજૂરી આપી દીધી છે. આ પ્રોજેક્ટ પર પણ લગભગ રૂ. 2,730 કરોડનો ખર્ચ થશે. આ રોપ-વેનું અંતર 12.4 કિલોમીટર હશે. આ પ્રોજેક્ટ પૂર્ણ થયા બાદ હેમકુંડ જનારા યાત્રિકો માટે સરળતા રહેશે અને હાલમાં જે યાત્રા 10 કલાકમાં થાય છે તે ઘટીને માત્ર 1 કલાક થઈ જશે. આ રોપ-વે ગોવિંદઘાટથી હેમકુંડ સાહિબ સુધી બનાવવામાં આવશે, જે વેલી ઑફ ફ્લાવર્સમાં જતા લોકોને પણ સુવિધા આપશે.

કેદારનાથ માટે જે રોપ-વે બનાવવામાં આવી રહ્યો છે તે અત્યાધુનિક ટ્રાઇ-કેબલ ગોંડોલાથી બનાવવામાં આવી રહ્યો છે. આ રોપ-વે દર કલાકે 1,800 મુસાફરોને લઈ જવાની ક્ષમતા ધરાવે છે અને એક દિવસમાં 18 હજાર મુસાફરો બાબાના દર્શન કરી શકશે. હાલમાં કેદારનાથ ધામના દરવાજા માત્ર 6 મહિના માટે જ ખુલ્લા છે અને દર વર્ષે લગભગ 20 લાખ શ્રદ્ધાળુઓ અહીં દર્શન માટે જાય છે.