માન્ચેસ્ટર ટેસ્ટ ડ્રો થયા બાદ ખરાબ સમાચાર! રિષભ પંત ટેસ્ટ સિરીઝમાંથી બહાર, નવા વિકેટકીપરની એન્ટ્રી

Rishabh Pant : ભારતનો વિકેટકીપર-બેટ્સમેન રિષભ પંત ઈજાના કારણે પાંચમી ટેસ્ટમાંથી બહાર થઈ ગયો છે. બીસીસીઆઈએ રવિવારે પુષ્ટિ કરી હતી કે માન્ચેસ્ટરમાં ચોથી ટેસ્ટ ડ્રો થયા બાદ પંત એન્ડરસન-તેંડુલકર ટ્રોફીની પાંચમી ટેસ્ટ માટે ઉપલબ્ધ નથી. તેના સ્થાને નારાયણ જગદીસનને ટીમમાં સામેલ કરવામાં આવ્યો છે.

જગદીસનને તક મળી

તમિલનાડુના 29 વર્ષીય વિકેટકીપર-બેટ્સમેનને પહેલીવાર ભારતની ટેસ્ટ ટીમમાં સામેલ કરવામાં આવ્યો છે. પંતના સ્થાને ઈશાન કિશન બીસીસીઆઈની પહેલી પસંદગી હોવાનું કહેવાય છે, પરંતુ ઝારખંડનો વિકેટકીપર-બેટ્સમેન હાલમાં પગની ઘૂંટીની ઈજા સામે ઝઝૂમી રહ્યો છે.

જગદીશનનો રેકોર્ડ

જગદીશને અત્યાર સુધીમાં કુલ 52 ફર્સ્ટ ક્લાસ મેચ રમી છે. આમાં તેણે 10 સદી અને 14 અડધી સદીની મદદથી કુલ 3373 રન બનાવ્યા છે. 2024-25 રણજી ટ્રોફી સીઝનમાં તેણે તમિલનાડુ માટે આઠ મેચમાં 674 રન બનાવ્યા. તેની બેટિંગ સરેરાશ 56.16 હતી અને તેણે પાંચ અડધી સદી ઉપરાંત બે વાર 100 રનનો આંકડો પાર કર્યો. વિકેટકીપર-બેટ્સમેનોમાં ફક્ત વિદર્ભના અક્ષય વાડકર (10 મેચમાં 45.12ની સરેરાશથી 722 રન)એ તેના કરતા વધુ રન બનાવ્યા છે.

જગદીશનનો IPL રેકોર્ડ

જગદીશન IPLમાં બે ટીમો માટે રમ્યો છે. તેણે ચેન્નાઈ સુપર કિંગ્સ અને કોલકાતા નાઈટ રાઈડર્સ માટે કુલ 13 મેચ રમી છે. બે સીઝનમાં, તેણે ચેન્નાઈ માટે સાત મેચમાં 73 રન બનાવ્યા. IPL 2023માં તેણે કોલકાતા માટે છ મેચમાં કુલ 89 રન બનાવ્યા.

ભારત-ઇંગ્લેન્ડ શ્રેણીમાં પંતનું પ્રદર્શન

પંતે ભારત-ઇંગ્લેન્ડ ટેસ્ટ સિરીઝમાં સાત ઇનિંગ્સમાં કુલ 479 રન બનાવ્યા છે. તેણે 20થી 24 જૂન દરમિયાન હેડિંગલી, લીડ્સ ખાતે રમાયેલી શ્રેણીની પ્રથમ મેચમાં બે સદી (134 અને 118) ફટકારી હતી. આ પછી તેણે એજબેસ્ટન ખાતે બીજી ટેસ્ટની બે ઇનિંગ્સમાં 25 અને 65 રન બનાવ્યા. પંતે લોર્ડ્સ ટેસ્ટની પ્રથમ ઇનિંગ્સમાં 74 રન બનાવ્યા હતા પરંતુ બીજી ઇનિંગ્સમાં 9 રન બનાવીને આઉટ થયો હતો. ટીમ ઇન્ડિયા આ મેચ હારી ગઈ. પંતે માન્ચેસ્ટર ટેસ્ટની પ્રથમ ઇનિંગ્સમાં 75 બોલમાં 54 રન બનાવ્યા હતા.

પાંચમી ટેસ્ટ માટે ભારતની ટીમ 

શુભમન ગિલ (કેપ્ટન), યશસ્વી જયસ્વાલ, કેએલ રાહુલ, સાઈ સુદર્શન, અભિમન્યુ ઈસ્વરન, કરુણ નાયર, રવિન્દ્ર જાડેજા, ધ્રુવ જુરેલ (વિકેટકીપર), વોશિંગ્ટન સુંદર, શાર્દુલ ઠાકુર, જસપ્રીત બુમરાહ, મોહમ્મદ સિરાજ, પ્રસિદ્ધ કૃષ્ણા, આકાશ દીપ, કુલદીપ યાદવ, અંશુલ કંબોજ, અર્શદીપ સિંહ, એન જગદીસન (વિકેટકીપર).