ଅଭିନେତା ପିୟୁଷଙ୍କୁ ନେଇ ବିବାଦ ଘଟଣା, କୋର୍ଟର ଦ୍ୱାରସ୍ଥ ହେବେ ସିଂହବାହିନୀ ପ୍ରଯୋଜକ

ଲୋକପ୍ରିୟ ଯାତ୍ରା ଅଭିନେତା ପିୟୁଷଙ୍କ ନାଁରେ ସଙ୍ଗୀନ ଅଭିଯୋଗ ଆସିଛି । ଟଙ୍କା ସହ ଗାଡ଼ି ନେବା ପରେ ପିୟୁଷ ଏବେ ଯାତ୍ରା ସିଂହବାହିନୀରେ ଯୋଗ ଦେବାକୁ ମନା କରୁଛନ୍ତି ବୋଲି ପ୍ରଯୋଜକ ଅଭିଯୋଗ ଆଣିଛନ୍ତି ।

ଭୁବନେଶ୍ୱର:  ପୁଣିଥରେ ବିବାଦ ଘେରକୁ ଆସିଛନ୍ତି ଲୋକପ୍ରିୟ ଯାତ୍ରା ଅଭିନେତା ପିୟୁଷ ତ୍ରିପାଠୀ । ଯାତ୍ରା ସିଂହବାହିନୀ ମାଲିକଙ୍କ ନିକଟରୁ ପିୟୁଷ ଟଙ୍କା ଏବଂ ଗାଡ଼ି ନେବା ପରେ ମଧ୍ୟ ଏବେ ଯାତ୍ରାରେ ଯୋଗ ଦେବାକୁ ମନା କରୁଛନ୍ତି । ଏଭଳି କିଛି ସଙ୍ଗୀନ ଅଭିଯୋଗ କରିଛନ୍ତି ଯାତ୍ରା ସିଂହବାହିନୀ ମାଲିକ ସଂଜୀବ ପାଢୀ । ପୂର୍ବରୁ ଯାତ୍ରା ସିଂହାବାହିନୀ ପକ୍ଷରୁ ସୋସିଆଲ ମିଡିଆରେ ପିୟୁଷ ତ୍ରିପାଠୀଙ୍କ ନାମ ଷ୍ଟାରକାଷ୍ଟରେ ପ୍ରକାଶ କରିବାରୁ ଏହି ବିବାଦ ଅଧିକ ଘନେଇଛି ।

ଅନ୍ୟପଟେ ଅଭିନେତା ପିୟୁଷ ସୋସିଆଲ ମିଡ଼ିଆରେ ଭିଡିଓ ଜାରି କରି କହିଛନ୍ତି ଯେ, ମୁଁ କେବେ ସିଂହବାହିନୀକୁ ଯିବି ନାହିଁ । ପିୟୁଷଙ୍କ କହିବାନୁଯାୟୀ, ଯାତ୍ରା ସିଂହବାହିନୀ ପକ୍ଷରୁ ଅଫିସିଆଲ ସୋସିଆଲ ମିଡିଆ ପେଜରେ ପୋଷ୍ଟ କରାଯାଇଛି ଯେ, ମୁଁ ଆସନ୍ତା ବର୍ଷ ସିଂହବାହିନୀ ଯିବି । କଥାଟା ସମ୍ପୂର୍ଣ୍ଣ ସତ୍ୟ ନୁହେଁ କି ସମ୍ପୂର୍ଣ୍ଣ ମିଥ୍ୟା ମଧ୍ୟ ନୁହେଁ । ସେ ଅନୁଷ୍ଠାନକୁ ଯିବା ପାଇଁ ବାବୁଙ୍କ ସହ ମୋର କଥାବାର୍ତ୍ତା ହୋଇଥିଲା ଚୁକ୍ତି ମଧ୍ୟ ହୋଇଥିଲା। କିନ୍ତୁ ସମୟାନୁକ୍ରମେ ମାଲିକ ଏବଂ କଳାକାରଙ୍କ ମଧ୍ୟରେ ଯେଉଁ ବୁଝାମଣା ରହିବା କଥା ତାହାର ଘୋର ଅଭାବ ଦେଖାଯାଇଥିଲା । ଯାହା ଫଳରେ ସୁସ୍ଥ ମସ୍ତିକରେ ସେହି ଅନୁଷ୍ଠାନରେ ବର୍ଷେ କାମ କରିବା ଏବଂ ଶତ ପ୍ରତିଶତ ଦେବା ମୁଁ ସଠିକ୍ ଭାବିଲି ନାହିଁ । ତେଣୁ ମୁଁ ବାବୁ ଆପଣଙ୍କୁ ମନା କଲି ଯେ ମୁଁ ଆସିପାରିବି ନାହିଁ । କିନ୍ତୁ ପିୟୁଷଙ୍କ କହିବା ପରେ ମଧ୍ୟ ତାଙ୍କ ଫଟୋକୁ ସୋସିଆଲ ମିଡ଼ିଆରେ ପୋଷ୍ଟ କରାଗଲା ଏବଂ ସେ ନିନ୍ଦାର ପାତ୍ର ହେଲେ ବୋଲି ପିୟୁଷ ଅଭିଯୋଗ କରିଛନ୍ତି । ପିୟୁଷ ଏକଥା ମଧ୍ୟ କହିଥିଲେ ଯେ, କେବଳ ଆସନ୍ତାବର୍ଷ ନୁହେଁ ମୁଁ ଯାତ୍ରାରେ ଥିବା ପର୍ଯ୍ୟନ୍ତ ସିଂହବାହିନୀ ସହ ନାହିଁ । ମୁଁ ଅପେରା ସୂର୍ଯ୍ୟ ମନ୍ଦିରରେ କାର୍ଯ୍ୟରତ ଥିଲି, ଏବେ ଅଛି ଏବଂ ଆସନ୍ତାବର୍ଷ ମଧ୍ୟ କାର୍ଯ୍ୟରତ ରହିବି ବୋଲି ପିୟୁଷ କହିଥିଲେ। 

ଅନ୍ୟପଟେ ଏହି ଘଟଣାକୁ ନେଇ ପ୍ରତିକ୍ରିୟା ରଖିଛନ୍ତି ଯାତ୍ରା ସିଂହବାହିନୀ ମାଲିକ ସଂଜୀବ ପାଢୀ । ତାଙ୍କ କହିବାନୁଯାୟୀ, ପିୟୁଷ ବାବୁ ଗତ ନଭେମ୍ବରରେ ମୋତେ ହଠାତ୍ ଫୋନ୍ କରିଥିଲେ । ପିୟୁଷ କହିଥିଲେ ଯେ, ବାବୁ ମୁଁ ଆପଣଙ୍କ ପାର୍ଟିରେ କାମ କରିବାକୁ ଚାହୁଁଛି । କିନ୍ତୁ ଆସନ୍ତାବର୍ଷ ପାଇଁ କାହ୍ନା ବାବୁଙ୍କ ସହ ଆମର କଥା ହୋଇଥିଲା ଏବଂ ଏହାସହ ନାଟକ ମଧ୍ୟ ଡିକ୍ଲାର ହୋଇଥିଲା । ଏହା ସତ୍ୱେ ମଧ୍ୟ ଏକ ହୋଟେଲରେ ଆଲୋଚନା ହୋଇଥିଲା । ସେଠି ଫାଇନାଲ୍ ହୋଇଥିଲା ଯେ, ପିୟୁଷ ମୋ ପାର୍ଟିରେ ୫ବର୍ଷ ପର୍ଯ୍ୟନ୍ତ କାର୍ଯ୍ୟ କରିବେ । ଏହାପରେ ସେଠାରେ ଏଗ୍ରିମେଣ୍ଟ କରିଥିଲେ । ଅଗ୍ରୀମ ଭାବେ ତାଙ୍କୁ ଏକ ଗାଡ଼ି ଦେବାକୁ ସେ କହିଥିଲେ । ଏହା ସହ ବାର୍ଷିକ ୭୦ଲକ୍ଷ ଟଙ୍କା ଦେବା ପାଇଁ ପିୟୁଷ କହିଥିଲେ । ପିୟୁଷ ବ୍ୟବହାର କରୁଥିବା ଗାଡ଼ିଟି ଆମ ସଂସ୍ଥା ନାଁରେ ରହିଛି । ୧୧ ଡିସେମ୍ବରରେ ସେ ଆମଠାରୁ ଗାଡ଼ି ନେଇଛନ୍ତି। ପିୟୁଷ ବାବୁଙ୍କୁ ମୁଁ ଏପର୍ଯ୍ୟନ୍ତ ୫୫ ଲକ୍ଷ ଟଙ୍କା ଦେଇଛି । ୩୦ଲକ୍ଷ ଟଙ୍କା ଆକାଉଣ୍ଟରେ ଏବଂ ନଗଦ ୨୫ଲକ୍ଷ ଟଙ୍କା ନେଇଛନ୍ତି ବୋଲି ସିଂହବାହିନୀ ମାଲିକ କହିଛନ୍ତି । ଗାଡ଼ି ବାବଦରେ ଏଗ୍ରିମେଣ୍ଟ ହୋଇ ସାରିଛି । ୫ ବର୍ଷ ପାଇଁ ସିଂହବାହିନୀରେ ରହିବି ଏବଂ ଗାଡି ସେହି କ୍ରମରେ ନେଇଛି ବୋଲି ସେଥିରେ ଲେଖା ରହିଛି । ସେ ତାଙ୍କ ପିଲାମାନଙ୍କ ମୁଣ୍ଡ ଛୁଇଁ ମଧ୍ୟ କହିଛନ୍ତି । ଖଣ୍ଡଗିରି ମେଳା ସମୟରେ ସେ ମୋ ସହ ପୁରୀ ଯାଇଥିଲେ ଏବଂ ସେଠାରେ ପ୍ରତିଜ୍ଞା ମଧ୍ୟ କରିଥିଲେ । ମୋ ପାଖରେ ପ୍ରତିବର୍ଷ ୭୦ ଲକ୍ଷ ଟଙ୍କାରେ ଚୁକ୍ତି କରିଥିଲେ । କିନ୍ତୁ ସେ ଏବେ ମୋ ଫୋନ ଉଠାଉନାହାନ୍ତି । ବର୍ତ୍ତମାନ ଏହା ମୋର ଇଜ୍ଜତର କଥା ମୋ ସମ୍ମାନକୁ ଯଦି ବାଧେ ମୁଁ କିଛି ବି କରିପାରେ । ଏଥିସହ ସିଂହବାହିନୀ ମାଲିକ ଏକଥା ମଧ୍ୟ କହିଛନ୍ତି ଯେ, ଆଗକୁ ମୁଁ କୋର୍ଟଙ୍କ ଦ୍ୱାରସ୍ଥ ହେବି ।