ନ୍ୟୁୟର୍କ ଇଣ୍ଡିଆନ୍ ଫିଲ୍ମ ଫେଷ୍ଟିଭାଲରେ ଚମକିବ ଓଡି଼ଆ ଫିଲ୍ମ ‘ରଂଗଶୁର’

Ollywood News: ବିଗତ କିଛି ଦିନ ହେବ ଓଡ଼ିଆ ଚଳଚ୍ଚିତ୍ର ପ୍ରତି ଲୋକଙ୍କର ରୁଚି ବଢିବା ସହିୟ ବଡ ପରଦାରେ ମଧ୍ୟ ଭଲ ବ୍ୟବସାୟ କରୁଛି ଓଡିଆ ଫିଲ୍ମ । ଚଳଚ୍ଚିତ୍ର ପାଇଁ ସବୁଠୁ ମୁଖ୍ୟ ବିଷୟ ଏବେ ପାଲଟିଛି ଭିନ୍ନ ଓ ବାସ୍ତବବାଦ କାହାଣୀ । ଆଗକୁ ଆହୁରି ଭଲ ଭଲ ଫିଲ୍ମ ମୁକ୍ତିଲାଭ କରିବାକୁ ଯାଉଥିବା ବେଳେ ଅନ୍ତର୍ଜାତୀୟ ସ୍ତରରେ ପ୍ରଶଂସା ସାଉଁଟିଛି ଓଡିଆ ଫିଲ୍ମ ‘ରଙ୍ଗଶୁର’ । ମୁନ୍ ଟିଭି ଓ ପ୍ରକାଶ ଫିଲ୍ମ୍ସ ବ୍ୟାନରରେ ସଚ୍ଚିକାନ୍ତ ଜେନା ଓ ପ୍ରଶାନ୍ତ ବେହେରା ଙ୍କ ପ୍ରଯୋଜନାରେ ନିର୍ମିତ ହୋଇଛି ଓଡ଼ିଆ ଚଳଚ୍ଚିତ୍ର ରଙ୍ଗଶୁର । ଚୌଧୁରୀ ବିକାଶ ଦାସ, ଚୌଧୁରୀ ଜୟ ପ୍ରକାଶ ଦାସ, ସମରେଶ ରାଉତରାୟ, ଦୀପନ୍ୱିତ ଦାସ ମହାପାତ୍ର, ଶୁଭାଶିଷ, ସୂର୍ଯ୍ୟମୟୀ, ଶୁଭଶ୍ରୀ ଜେନା ପ୍ରମୁଖ କଳାକାରମାନେ ଅଭିନୟ କରିଛନ୍ତି । ନିର୍ଦ୍ଦେଶନା ଦେଇଛନ୍ତି ପ୍ରତାପ ରାଉତ, ସଂଳାପ ରଚନା କରିଛନ୍ତି ଡଃ ରଜନୀ ରଞ୍ଜନ । ସଙ୍ଗୀତ ନିର୍ଦ୍ଦେଶନା ଦେଇଛନ୍ତି ଗୌରବ ଆନନ୍ଦ ଏବଂ ବୋନି । ଯାହାର ପ୍ରଚାର ଓ ପ୍ରସାର ଦାୟିତ୍ୱ ନେଇଥିଲେ ମିଡ଼ିଆ ପ୍ଲାନର କ୍ରି୍ଏଟିଭ ହେଡ଼ ପ୍ରଣୟ ଜେଠୀ ।

ଫିଲ୍ମରେ ଆମ ଓଡ଼ିଆ ମାଟିର କଥାକୁ ଉପସ୍ଥାପନା କରାଯାଇଛି । ପାରମ୍ପରିକ ବାଘ ନାଚକୁ ନେଇ ଫିଲ୍ମ ଗତିଶୀଳ । ଓଡିଶାରେ ଧୀରେ ଧୀରେ ଲୋପ ପାଇବାକୁ ବସିଥିବା ବହୁ ପୁରାତନ ପାରମ୍ପରିକ ନୃତ୍ୟ ବାଘ ନାଚ ପାଇଁ ସଂଘର୍ଷ ଓ ଏହା ପଛର କାହାଣୀକୁ ଫିଲ୍ମରେ ଦର୍ଶାଯାଇଛି । ଫିଲ୍ମର କଣ୍ଟେଣ୍ଟ ଖୁବ ଭିନ୍ନ ରହିବା ସହିତ ଏଥିରେ ଓଡିଶାର ଲୋକକଳା, ପରମ୍ପରା ଓ ସଂସ୍କୃତିକୁ ଉଲ୍ଲେଖ କରାଯାଇଛି । ଫିଲ୍ମଟି ବଡ଼ ପରଦାରେ ଜାନୁଆରୀ ୧୨ ତାରିଖରେ ରିଲିଜ ହୋଇଥିଲା । ତେବେ ରିଲିଜ ହେବାର ଏତେ ଦିନ ବିତିଯାଇଥିବା ପରେ ମଧ୍ୟ ସରିନାହିଁ ଫିଲ୍ମର କ୍ରେଜ୍ । 

କହିରଖୁ ଯେ ନ୍ୟୁୟର୍କରେ ଅନୁଷ୍ଠିତ ହେବାକୁ ଥିବା ଭାରତୀୟ ଚଳଚ୍ଚିତ୍ର ସମ୍ମିଳନୀରେ ‘ରଙ୍ଗଶୁର’ ଫିଲ୍ମଟି ପ୍ରସାରିତ ହେବାକୁ ଯାଉଛି ଯାହା ଓଡି଼ଆ ଚଳଚ୍ଚିତ୍ର ଜଗତ ପାଇଁ ଖୁବ ଗର୍ବ ଏବଂ ଗୌରବର ବିଷୟ । ଏହାକୁ ନେଇ ଫିଲ୍ମ ନିର୍ମାଣକାରୀ ସଂସ୍ଥା ଖୁବ ଆଶାବାଦୀ ରହିବା ସହିତ ଓଡି଼ଶାର ଜନତା ଓ ଫିଲ୍ମରେ ଥିବା ସମସ୍ତ କଳାକାରଙ୍କୁ ଏହାପାଇଁ ସାଧୁବାଦ ଜଣାଇଛନ୍ତି । ଏହା ସହିତ ଫିଲ୍ମଟି କେମିତି ଆହୁରି ଅଧିକ ଲୋକଙ୍କ ପାଖରେ ପହଞ୍ଚି ପାରିବ ତାକୁ ନେଇ ମଧ୍ୟ ଆଗାମୀ ଦିନରେ ଚେଷ୍ଟା ଜାରି ରହିବ । ଅନ୍ତର୍ଜାତୀୟ ସ୍ତରରେ ଓଡିଆ ଫିଲ୍ମକୁ ଗୁରୁତ୍ବ ମିଳିବା ହେଉଛି ଖୁସି ଓ ଗର୍ବର ବିଷୟ ।