ଖଡଗେଙ୍କ ବଡ଼ ଟାର୍ଗେଟ୍ ! କହିଲେ, ପହଲଗାମ ଆକ୍ରମଣ ପୂର୍ବରୁ କାଶ୍ମୀର ଗସ୍ତ ବାତିଲ କରିଥିଲେ ପ୍ରଧାନମନ୍ତ୍ରୀ

ନୂଆଦିଲ୍ଲୀ: କଂଗ୍ରେସ ସଭାପତି ମଲ୍ଲିକାର୍ଜୁନ ଖଡଗେ ଏକ ବଡ଼ ଅଭିଯୋଗ ଆଣିଛନ୍ତି । ସେ କହିଛନ୍ତି ଯେ, ପହଲଗାମରେ ଆତଙ୍କବାଦୀ ଆକ୍ରମଣର ତିନି ଦିନ ପୂର୍ବରୁ ଗୁଇନ୍ଦା ରିପୋର୍ଟ ପାଇବା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କାଶ୍ମୀର ଗସ୍ତ ବାତିଲ କରିଥିଲେ।

ଆପଣଙ୍କୁ କହିରଖିବାକୁ ଚାହୁଁ ଯେ, ଏପ୍ରିଲ ୨୨ ତାରିଖ ଦିନ ଆତଙ୍କବାଦୀମାନେ ପହଲଗାମ ରିସର୍ଟ ସହରରୁ ପ୍ରାୟ ଛଅ କିଲୋମିଟର ଦୂରରେ ଥିବା ବୈସାରନ ନାମକ ପର୍ଯ୍ୟଟନସ୍ଥଳରେ ଗୁଳି ମାଡ କରିବା ଫଳରେ ୨୬ ଜଣ ପର୍ଯ୍ୟଟକଙ୍କର ମୃତ୍ୟୁ ହୋଇଥିଲା । ୨୦୧୯ରେ ପୁଲୱାମା ଆକ୍ରମଣ ପରେ ଏହା କାଶ୍ମୀରରେ ଘଟିଥିବା ସବୁଠାରୁ ଭୟଙ୍କର ଆକ୍ରମଣ ମଧ୍ୟରୁ ଗୋଟିଏ ଥିଲା।

ଖଡଗେଙ୍କ କହିବାନୁଯାୟୀ, ସର୍ବଦଳୀୟ ବୈଠକରେ କେନ୍ଦ୍ର ଗୁଇନ୍ଦା ବିଫଳତାକୁ ସ୍ୱୀକାର କରିଛି । କେନ୍ଦ୍ର କହିଛି ଯେ, କାଶ୍ମୀରରେ ଲୋକଙ୍କ ସୁରକ୍ଷା ପାଇଁ ସୁରକ୍ଷା ବ୍ୟବସ୍ଥାକୁ ମଜବୁତ ନକରିବା ପାଇଁ ଏହାକୁ ଦାୟୀ କରାଯିବା ଉଚିତ। ଖଡଗେ ଅଭିଯୋଗ ଅନୁଯାୟୀ, "ମୁଁ ଏହା ସୂଚନା ପାଇଛି ଯେ, ଆକ୍ରମଣର ତିନି ଦିନ ପୂର୍ବରୁ ମୋଦିଜୀଙ୍କ ପାଖକୁ ଏକ ଗୁପ୍ତଚର ରିପୋର୍ଟ ପଠାଯାଇଥିଲା । ସେଥିପାଇଁ ମୋଦିଜୀ ତାଙ୍କର କାଶ୍ମୀର ଗସ୍ତ ବାତିଲ କରିଥିଲେ । ଯେତେବେଳେ ଗୁଇନ୍ଦା ରିପୋର୍ଟରେ କୁହାଯାଇଥିଲା ଯେ, ଆପଣଙ୍କ ସୁରକ୍ଷା ପାଇଁ ସେଠାକୁ ଯିବା ଉଚିତ ନୁହେଁ, ଆପଣ ଲୋକଙ୍କ ସୁରକ୍ଷା ପାଇଁ ଆପଣଙ୍କ ସୁରକ୍ଷା, ଗୁପ୍ତଚର, ସ୍ଥାନୀୟ ପୋଲିସ ଏବଂ ସୀମା ବଳକୁ କାହିଁକି ସୂଚନା ଦେଇ ନଥିଲେ ? " କଂଗ୍ରେସ ନେତା କହିଛନ୍ତି, "ଯେତେବେଳେ ଆପଣ ସୂଚନା ପାଇଲେ, ଆପଣ ଆପଣଙ୍କର କାର୍ଯ୍ୟକ୍ରମ ବାତିଲ କରିଦେଲେ କିନ୍ତୁ ପର୍ଯ୍ୟଟକଙ୍କ ସୁରକ୍ଷା ପାଇଁ ଯତ୍ନବାନ ହେଲେନାହିଁ କାହିଁକି ? ସେଠାରେ ଅଧିକ ଫୋର୍ସ ମୁତୟନ କଲେ ନାହିଁ କାହିଁକି ? 

" ରାଞ୍ଚିରେ ଅନୁଷ୍ଠିତ ଏକ ରାଲିକୁ ସମ୍ବୋଧିତ କରି କଂଗ୍ରେସ ଅଧ୍ୟକ୍ଷ ଦାବି କରିଛନ୍ତି, "ସର୍ବଦଳୀୟ ବୈଠକରେ, ପ୍ରଧାନମନ୍ତ୍ରୀ ସ୍ୱୀକାର କରିଛନ୍ତି ଯେ , ଘଟଣାରେ ଗୁପ୍ତଚର ତ୍ରୁଟି ଥିଲା ଏବଂ କେନ୍ଦ୍ର ଗୁଇନ୍ଦା ବିଫଳତାକୁ ସ୍ୱୀକାର କରିଥିଲା । ପହଲଗାମ ଆକ୍ରମଣ ପରେ ପାକିସ୍ତାନ ବିରୁଦ୍ଧରେ ଯେକୌଣସି କାର୍ଯ୍ୟାନୁଷ୍ଠାନରେ କଂଗ୍ରେସ କେନ୍ଦ୍ର ସହିତ ଛିଡ଼ା ହେବ, କାରଣ ଦେଶ ସର୍ବୋଚ୍ଚ ଏବଂ ଦଳ, ଧର୍ମ ଏବଂ ଜାତିଠାରୁ ଉର୍ଦ୍ଧ୍ୱରେ।

ଅନ୍ୟପଟେ, ଖଡଗେଙ୍କ ଅଭିଯୋଗର ଜବାବ ଦେଇ ବିଜେପି କହିଛି ଯେ, କଂଗ୍ରେସ ଅଧ୍ୟକ୍ଷଙ୍କ ପ୍ରଧାନମନ୍ତ୍ରୀ ମୋଦୀଙ୍କ ସମାଲୋଚନା ସୁରକ୍ଷା ବାହିନୀର ମନୋବଳ ଭାଙ୍ଗିବା ପାଇଁ ଥିଲା। ଝାଡ଼ଖଣ୍ଡ ବିଜେପି ମୁଖ୍ୟ ବାବୁଲାଲ ମାରାଣ୍ଡି କହିଛନ୍ତି ଯେ, ଖଡଗେଙ୍କ ମନ୍ତବ୍ୟ ଏପରି ଏକ ସମୟରେ ଆସିଛି ଯେତେବେଳେ ଆତଙ୍କବାଦ ଏବଂ ପାକିସ୍ତାନ ବିରୋଧରେ ଲଢ଼େଇ ଏକ ନିର୍ଣ୍ଣାୟକ ମୋଡ଼ରେ ପହଞ୍ଚିଛି। କଂଗ୍ରେସ ଅଧ୍ୟକ୍ଷଙ୍କ ମନ୍ତବ୍ୟ ଉପରେ ପ୍ରତିକ୍ରିୟା ଦେଇ ମାରାଣ୍ଡି ପିଟିଆଇକୁ କହିଛନ୍ତି ଯେ, "ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଖଡଗେଙ୍କ ଟାର୍ଗେଟ୍ ସୁରକ୍ଷା ଏଜେନ୍ସିଗୁଡ଼ିକର ମନୋବଳ ଭାଙ୍ଗିବା ପାଇଁ ଉଦ୍ଦିଷ୍ଟ। ସେ ଏପରି ସମୟରେ ଏହି ମନ୍ତବ୍ୟ ଦେଇଛନ୍ତି ଯେତେବେଳେ ଆତଙ୍କବାଦ ଏବଂ ପାକିସ୍ତାନ ବିରୋଧରେ ଲଢ଼େଇ ନିର୍ଣ୍ଣାୟକ ପର୍ଯ୍ୟାୟରେ ରହିଛି।" ମାରାଣ୍ଡି ଏହା ମଧ୍ୟ ଅଭିଯୋଗ କରିଛନ୍ତି ଯେ, କଂଗ୍ରେସ ଏପରି ଏକ ସମୟରେ ରାଜନୀତି କରୁଛି ଯେତେବେଳେ ସମଗ୍ର ଦେଶ ଆତଙ୍କବାଦ ବିରୋଧରେ ଲଢ଼େଇରେ ପ୍ରଧାନମନ୍ତ୍ରୀ ମୋଦୀଙ୍କ ସହିତ ଛିଡ଼ା ହୋଇଛି। ଖଡଗେଙ୍କ ମନ୍ତବ୍ୟ ଅନୁପଯୁକ୍ତ ବୋଲି ସେ କହିଛନ୍ତି ।