Petrol Diesel Price: ହ୍ରାସ ପାଇବ ପେଟ୍ରୋଲ ଏବଂ ଡିଜେଲ ମୂଲ୍ୟ, ଇସାରା ଦେଲେ କେନ୍ଦ୍ରମନ୍ତ୍ରୀ

କେନ୍ଦ୍ର ପେଟ୍ରୋଲିୟମ ମନ୍ତ୍ରୀ ହରଦୀପ ସିଂହ ପୁରୀ କହିଛନ୍ତି ଯେ ବର୍ତ୍ତମାନ ସରକାର ଉତ୍ପାଦ ଶୁଳ୍କ ହ୍ରାସ ସହ୍ୟ କରି ସାଧାରଣ ଲୋକଙ୍କୁ ତୈଳ ମୂଲ୍ୟରେ ଆଶ୍ୱସ୍ତି ଦେଉଛନ୍ତି। ସରକାର ନଭେମ୍ବର ୨୦୨୧ ଓ ମେ ୨୦୨୨ ରେ ଟିକସ ହ୍ରାସ କରିଥିଲେ। ସେହି ସମୟ ମଧ୍ୟରେ ପେଟ୍ରୋଲ ଏବଂ ଡିଜେଲ ଯଥାକ୍ରମେ ଲିଟର ପିଛା ୧୩ ଟଙ୍କା ଓ ୧୬ ଟଙ୍କା ହ୍ରାସ ପାଇଥିଲା।

କେନ୍ଦ୍ରମନ୍ତ୍ରୀ ହରଦୀପ ପୁରୀ CIIର ବିଜନେସ ସମିଟରେ କହିଛନ୍ତି ଯେ କେନ୍ଦ୍ର ଏବଂ ରାଜ୍ୟ ସରକାରଙ୍କ ପ୍ରୟାସ ଯୋଗୁଁ ଏହି ଆଶ୍ୱସ୍ତି ସମ୍ଭବ ହୋଇପାରିଛି। ଯେତେବେଳେ ଆମେ ଟିକସ ହ୍ରାସ କରିଥିଲୁ ରାଜ୍ୟଗୁଡ଼ିକ VAT ହ୍ରାସ କରିଥିଲେ। 

ସେ କହିଛନ୍ତି ଯେ ତୈଳ ମୂଲ୍ୟ, ବିଶ୍ୱ ଅଶୋଧିତ ତୈଳ ଦର, ବୀମା ଖର୍ଚ୍ଚ ଏବଂ ରିଫାଇନାରୀ ମାର୍ଜିନ୍ ତୈଳ ମୂଲ୍ୟ ପାଇଁ ଦାୟୀ। ଯଦି ଅନ୍ତର୍ଜାତୀୟ ବଜାରରେ ମୂଲ୍ୟ ସ୍ଥିର ରହେ ତେବେ ସରକାର ତୈଳ ମୂଲ୍ୟ ଆହୁରି ହ୍ରାସ କରିପାରିବେ।

କେନ୍ଦ୍ରମନ୍ତ୍ରୀ କହିଛନ୍ତି ବ୍ରାଜିଲ, ଗୁୟାନା, ସୁରିନାମ ଏବଂ କାନାଡାରୁ ଅଶୋଧିତ ତୈଳ ଉପଲବ୍ଧତା ଉପରେ ଗୁରୁତ୍ୱାରୋପ କରିଥିଲେ। ସେ କହିଥିଲେ ଯେ OPEC ଦେଶମାନଙ୍କ ଦ୍ୱାରା ଅଶୋଧିତ ତୈଳ ଉତ୍ପାଦନ ହ୍ରାସ ସତ୍ତ୍ୱେ ବିଶ୍ୱବ୍ୟାପୀ ଯୋଗାଣ ବୃଦ୍ଧି ପାଉଛି।

ମନ୍ତ୍ରୀ କହିଛନ୍ତି ସରକାର ତେଲ କିଣିବାର ରଣନୀତି ମଧ୍ୟ ପରିବର୍ତ୍ତନ କରିଛନ୍ତି। ଏବେ ଆମେ ୨୭ ଦେଶ ବଦଳରେ ୪୦ ଦେଶରୁ ତେଲ ଆମଦାନୀ କରୁଛୁ। ଆମେ ଆର୍ଜେଣ୍ଟିନାରୁ ମଧ୍ୟ କନସାଇନମେଣ୍ଟ ପାଉ।

ରୁଷରୁ ତୈଳ ଆମଦାନୀ ପ୍ରସଙ୍ଗରେ ସେ କହିଥିଲେ ଯେ ପ୍ରଧାନମନ୍ତ୍ରୀଙ୍କ ପ୍ରୟାସ ହେଉଛି ଜନସାଧାରଣ ଯେପରି ସୁଲଭ ମୂଲ୍ୟରେ ତେଲ କିଣିପାରିବେ। ଯଦି କୌଣସି ଦେଶରେ ତେଲ କମ୍ ମୂଲ୍ୟରେ ଉପଲବ୍ଧ ହୁଏ ତେବେ ଆମେ ତାହା କିଣିବୁ।