મહાકાલ દરબારનું એવું મંદિર જેમાં વર્ષમાં માત્ર એક જ દિવસ થાય છે પૂજા, જાણો નાગચંદ્રેશ્વર મંદિરનું રહસ્ય

આપણે નાગચંદ્રેશ્વર મંદિર વિશે વાત કરી રહ્યા છીએ. આ મંદિર ઉજ્જૈનના મહાકાલેશ્વર મંદિરના ત્રીજા માળે આવેલું છે. આ મંદિરની ખાસ વાત એ છે કે, તે આખા વર્ષમાં ફક્ત નાગપંચમીના દિવસે જ ખુલે છે. ફક્ત આ દિવસે જ ભક્તોને મંદિરમાં દર્શન કરવાની મંજૂરી છે.

મંદિરને એક દિવસ ખોલવા પાછળ એક પૌરાણિક કથા છે. જ્યારે નાગરાજ તક્ષકે ભગવાન શિવની પૂજા કરી, ત્યારે શિવે તેમને અમરત્વનું વરદાન અને મહાકાલ વનમાં રહેવાનું વરદાન આપ્યું હતું. આ સાથે જ એવું કહેવામાં આવ્યું હતું કે, તક્ષક હંમેશા એકાંતમાં રહેશે, તેથી જ આ મંદિર વર્ષમાં ફક્ત એક જ વાર એટલે કે નાગ પંચમીના દિવસે ખોલવામાં આવે છે.

શ્રી નાગચંદ્રેશ્વરનું દુર્લભ સ્વરૂપ શ્રી મહાકાલેશ્વર મંદિરના ત્રીજા માળે સ્થાપિત છે, જેને નાગરાજ તક્ષકનું નિવાસસ્થાન કહેવામાં આવે છે. એવું માનવામાં આવે છે કે, આ મંદિરમાં નાગચંદ્રેશ્વરના દર્શન કર્યા પછી જ વ્યક્તિ કોઈપણ પ્રકારના સર્પ દોષથી મુક્ત થાય છે.

આ મંદિરના દરવાજા ખુલતાની સાથે જ ત્રણ પ્રકારની પૂજા કરવામાં આવે છે. ત્રિકાલ પૂજા એટલે ત્રણ સમયે કરવામાં આવતી પૂજા. મધ્યરાત્રિ 12 વાગ્યે દરવાજા ખુલ્યા પછી મહાનિર્વાણી અખાડા દ્વારા પહેલી પૂજા કરવામાં આવે છે.

બીજી પૂજા નાગ પંચમીના દિવસે બપોરે 12 વાગ્યે વહીવટીતંત્ર વતી અધિકારીઓ દ્વારા કરવામાં આવે છે. ત્રીજી પૂજા સાંજે 7:30 વાગ્યે ભગવાન મહાકાલની આરતી પછી મંદિર સમિતિ વતી મહાકાલ મંદિરના પુજારીઓ દ્વારા કરવામાં આવે છે.

આ પછી મધ્યરાત્રિ 12 વાગ્યે આરતી પછી મંદિરના દરવાજા ફરીથી આખા વર્ષ માટે બંધ કરી દેવામાં આવે છે. નાગ પંચમીના દિવસે મંદિરમાં ઘણી ભીડ જોવા મળે છે. મધ્યરાત્રિ 12 વાગ્યાથી જ ભક્તોની કતારો જોવા મળે છે.