NIA ਨੇ ਪੁਲਿਸ ਚੌਂਕੀ 'ਤੇ ਗ੍ਰੇਨੇਡ ਹਮਲੇ ਦੇ ਮਾਮਲੇ ਵਿੱਚ ਤਿੰਨ ਮੁਲਜ਼ਮਾਂ ਵਿਰੁੱਧ ਚਾਰਜਸ਼ੀਟ ਕੀਤੀ ਦਾਇਰ

Nawanshahr Police Post Attack: ਰਾਸ਼ਟਰੀ ਜਾਂਚ ਏਜੰਸੀ (NIA) ਨੇ ਪੰਜਾਬ ਦੇ SBS ਨਗਰ ਜ਼ਿਲ੍ਹੇ ਵਿੱਚ ਇੱਕ ਪੁਲਿਸ ਚੌਂਕੀ 'ਤੇ ਗ੍ਰੇਨੇਡ ਹਮਲੇ ਦੇ ਮਾਮਲੇ ਵਿੱਚ ਤਿੰਨ ਮੁਲਜ਼ਮਾਂ ਵਿਰੁੱਧ ਚਾਰਜਸ਼ੀਟ ਦਾਇਰ ਕੀਤੀ ਹੈ। ਇਹ ਹਮਲਾ ਦਸੰਬਰ 2024 ਵਿੱਚ ਹੋਇਆ ਸੀ ਅਤੇ ਇਸਦੀ ਸਾਜ਼ਿਸ਼ ਪਾਬੰਦੀਸ਼ੁਦਾ ਅੱਤਵਾਦੀ ਸੰਗਠਨ ਖਾਲਿਸਤਾਨ ਜ਼ਿੰਦਾਬਾਦ ਫੋਰਸ (KZF) ਨਾਲ ਜੁੜੀ ਹੋਈ ਪਾਈ ਗਈ ਹੈ।

ਜਿਨ੍ਹਾਂ ਤਿੰਨ ਲੋਕਾਂ ਵਿਰੁੱਧ ਚਾਰਜਸ਼ੀਟ ਦਾਇਰ ਕੀਤੀ ਗਈ ਹੈ ਉਨ੍ਹਾਂ ਵਿੱਚ ਯੁਗਪ੍ਰੀਤ ਸਿੰਘ ਉਰਫ਼ ਯੂਵੀ ਨਿਹੰਗ, ਜਸਕਰਨ ਸਿੰਘ ਉਰਫ਼ ਸ਼ਾਹ ਅਤੇ ਹਰਜੋਤ ਸਿੰਘ ਉਰਫ਼ ਜੋਤ ਹੁੰਦਲ ਸ਼ਾਮਲ ਹਨ। ਇਹ ਤਿੰਨੋਂ ਪੰਜਾਬ ਦੇ SBS ਨਗਰ ਦੇ ਰਾਹੋਂ ਪਿੰਡ ਦੇ ਵਸਨੀਕ ਹਨ। ਉਨ੍ਹਾਂ 'ਤੇ UAPA, ਵਿਸਫੋਟਕ ਐਕਟ ਅਤੇ ਹੋਰ ਸਬੰਧਤ ਧਾਰਾਵਾਂ ਤਹਿਤ ਮਾਮਲਾ ਦਰਜ ਕੀਤਾ ਗਿਆ ਹੈ। NIA ਨੇ KZF ਮੁਖੀ ਅਤੇ ਘੋਸ਼ਿਤ ਅੱਤਵਾਦੀ ਰਣਜੀਤ ਸਿੰਘ ਉਰਫ਼ ਨੀਟਾ, ਨਾਲ ਹੀ ਸੰਗਠਨ ਮੈਂਬਰ ਜਗਜੀਤ ਸਿੰਘ ਲਹਿਰੀ ਉਰਫ਼ ਜੱਗਾ (ਜੋ ਇਸ ਸਮੇਂ ਯੂਕੇ ਵਿੱਚ ਹੈ) ਅਤੇ ਹੋਰ ਅਣਪਛਾਤੇ ਅੱਤਵਾਦੀਆਂ ਵਿਰੁੱਧ ਵੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।

ਐਨਆਈਏ ਨੂੰ ਆਪਣੀ ਜਾਂਚ ਵਿੱਚ ਪਤਾ ਲੱਗਾ ਹੈ ਕਿ ਜੱਗਾ ਜੋ ਕਿ ਬ੍ਰਿਟੇਨ ਵਿੱਚ ਹੈ, ਨੇ ਯੁਗਪ੍ਰੀਤ ਸਿੰਘ ਨੂੰ ਇੱਕ ਜਾਣਕਾਰ ਰਾਹੀਂ ਭਰਤੀ ਕੀਤਾ ਸੀ। ਉਸ ਨੇ ਯੁਗਪ੍ਰੀਤ ਨੂੰ ਕੱਟੜਪੰਥੀ ਬਣਾਇਆ ਅਤੇ ਉਸਨੂੰ ਏਨਕ੍ਰਿਪਟਡ ਮੈਸੇਜਿੰਗ ਐਪਸ ਰਾਹੀਂ ਨਿਰਦੇਸ਼ ਦਿੱਤੇ। ਇਸ ਤੋਂ ਇਲਾਵਾ ਕੈਨੇਡਾ ਵਿੱਚ ਮੌਜੂਦ ਕੁਝ ਲੋਕਾਂ ਰਾਹੀਂ ਯੁਗਪ੍ਰੀਤ ਨੂੰ ਲਗਭਗ 4.36 ਲੱਖ ਰੁਪਏ ਦੀ ਅੱਤਵਾਦੀ ਫੰਡਿੰਗ ਵੀ ਭੇਜੀ ਗਈ ਸੀ।

ਬਾਅਦ ਵਿੱਚ ਯੁਗਪ੍ਰੀਤ ਨੇ ਆਪਣੇ ਦੋ ਸਾਥੀਆਂ ਜਸਕਰਨ ਤੇ ਹਰਜੋਤ ਨਾਲ ਮਿਲ ਕੇ 1-2 ਦਸੰਬਰ 2024 ਦੀ ਰਾਤ ਨੂੰ ਐਸਬੀਐਸ ਨਗਰ ਵਿੱਚ ਐਸਰੋਨ ਪੁਲਿਸ ਚੌਂਕੀ 'ਤੇ ਗ੍ਰੇਨੇਡ ਹਮਲਾ ਕੀਤਾ। ਦੱਸਿਆ ਜਾ ਰਿਹਾ ਹੈ ਕਿ ਹਮਲੇ ਲਈ ਉਨ੍ਹਾਂ ਨੂੰ ਨਵੰਬਰ 2024 ਵਿੱਚ ਹੀ ਵਿਦੇਸ਼ ਤੋਂ ਗ੍ਰੇਨੇਡ ਮੁਹੱਈਆ ਕਰਵਾਏ ਗਏ ਸਨ।

ਐਨਆਈਏ ਇਸ ਮਾਮਲੇ (ਕੇਸ ਨੰਬਰ ਆਰਸੀ-02/2025/ਐਨਆਈਏ/ਡੀਐਲਆਈ) ਦੀ ਡੂੰਘਾਈ ਨਾਲ ਜਾਂਚ ਕਰ ਰਹੀ ਹੈ, ਤਾਂ ਜੋ ਕੇਜ਼ੈਡਐਫ ਦੀ ਪੰਜਾਬ ਵਿੱਚ ਕਾਨੂੰਨ ਵਿਵਸਥਾ ਅਤੇ ਸੁਰੱਖਿਆ ਬਲਾਂ ਨੂੰ ਨਿਸ਼ਾਨਾ ਬਣਾਉਣ ਦੀ ਸਾਜ਼ਿਸ਼ ਨੂੰ ਪੂਰੀ ਤਰ੍ਹਾਂ ਨਾਕਾਮ ਕੀਤਾ ਜਾ ਸਕੇ।