CSK vs RCB: ਮਹਿੰਦਰ ਸਿੰਘ ਧੋਨੀ ਦੇ ਬੱਲਾ ਜਾਂਚ ਵਿੱਚ ਹੋਇਆ ਫੇਲ੍ਹ; ਅੰਪਾਇਰ ਨੇ ਫਿਰ ਵੀ..

CSK vs RCB: ਆਈਪੀਐਲ 2025 ਵਿੱਚ ਇੱਕ ਨਵੀਂ ਚੀਜ਼ ਦੇਖਣ ਨੂੰ ਮਿਲ ਰਹੀ ਹੈ ਅਤੇ ਉਹ ਹੈ ਅੰਪਾਇਰਾਂ ਵੱਲੋਂ ਬੱਲੇ ਦੀ ਜਾਂਚ ਕਰਨਾ। ਜਦੋਂ ਵੀ ਕੋਈ ਨਵਾਂ ਬੱਲੇਬਾਜ਼ ਕ੍ਰੀਜ਼ 'ਤੇ ਆਉਂਦਾ ਹੈ ਤਾਂ ਫੀਲਡ ਅੰਪਾਇਰ ਆਪਣੀ ਗੇਜ ਨਾਲ ਬੱਲੇ ਦੀ ਜਾਂਚ ਕਰਦਾ ਹੈ। ਉਹ 3 ਮਈ ਦੀ ਰਾਤ ਨੂੰ ਵੀ ਕੁਝ ਅਜਿਹਾ ਹੀ ਕਰ ਰਿਹਾ ਸੀ, ਜਦੋਂ ਕੁਝ ਅਜਿਹਾ ਵਾਪਰਿਆ ਜਿਸ ਨੇ ਸਾਰਿਆਂ ਦਾ ਧਿਆਨ ਆਪਣੇ ਵੱਲ ਖਿੱਚ ਲਿਆ।

ਦਰਅਸਲ ਵਿੱਚ ਦੂਜੀ ਪਾਰੀ ਵਿੱਚ ਜਦੋਂ ਚੇਨਈ ਸੁਪਰ ਕਿੰਗਜ਼ 214 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰ ਰਹੀ ਸੀ। 17ਵੇਂ ਓਵਰ ਵਿੱਚ ਲਗਾਤਾਰ ਦੋ ਗੇਂਦਾਂ ਵਿੱਚ ਦੋ ਵਿਕਟਾਂ ਗੁਆਉਣ ਤੋਂ ਬਾਅਦ, ਮਹਿੰਦਰ ਸਿੰਘ ਧੋਨੀ ਮੈਦਾਨ ਵਿੱਚ ਉਤਰੇ। ਜਦੋਂ ਧੋਨੀ ਜ਼ੋਰਦਾਰ ਸ਼ੋਰ ਅਤੇ ਤਾੜੀਆਂ ਦੇ ਵਿਚਕਾਰ ਕ੍ਰੀਜ਼ 'ਤੇ ਪਹੁੰਚੇ, ਤਾਂ ਅੰਪਾਇਰ ਨੇ ਉਨ੍ਹਾਂ ਦਾ ਬੱਲਾ ਚੈੱਕ ਕਰਨਾ ਸ਼ੁਰੂ ਕੀਤਾ।

ਇਸ ਦੌਰਾਨ ਅੰਪਾਇਰ ਨੇ ਸੀਐਸਕੇ ਕਪਤਾਨ ਦੇ ਬੱਲੇ ਦੀ ਜਾਂਚ ਕੀਤੀ, ਜੋ ਟੈਸਟ ਵਿੱਚ ਫੇਲ੍ਹ ਹੋ ਗਿਆ। ਇਹ ਦੇਖ ਕੇ, ਇਸ ਮਹਾਨ ਵਿਕਟਕੀਪਰ-ਬੱਲੇਬਾਜ਼ ਨੇ ਖੁਦ ਬੱਲੇ ਨੂੰ ਗੇਜ ਨਾਲ ਮਾਪਣਾ ਸ਼ੁਰੂ ਕਰ ਦਿੱਤਾ। ਭਾਵੇਂ ਗੇਜ ਧੋਨੀ ਦੇ ਬੱਲੇ ਤੋਂ ਸਾਫ਼ ਨਹੀਂ ਲੰਘਿਆ ਫਿਰ ਵੀ ਮੈਦਾਨੀ ਅੰਪਾਇਰ ਨੇ ਉਸਨੂੰ ਖੇਡਣਾ ਜਾਰੀ ਰੱਖਣ ਦੀ ਇਜਾਜ਼ਤ ਦਿੱਤੀ।

ਨਿਯਮਾਂ ਮੁਤਾਬਕ ਕਿਸੇ ਵੀ ਬੱਲੇ ਦੀ ਚੌੜਾਈ 10.79 ਸੈਂਟੀਮੀਟਰ ਤੋਂ ਜ਼ਿਆਦਾ ਨਹੀਂ ਹੋਣੀ ਚਾਹੀਦੀ ਤੇ ਮੋਟਾਈ 6.7 ਸੈਂਟੀਮੀਟਰ ਤੋਂ ਜ਼ਿਆਦਾ ਨਹੀਂ ਹੋਣੀ ਚਾਹੀਦੀ, ਜਦੋਂ ਕਿ ਬੱਲੇ ਦੇ ਕੰਢਿਆਂ ਦੀ ਚੌੜਾਈ 4 ਸੈਂਟੀਮੀਟਰ ਤੋਂ ਜ਼ਿਆਦਾ ਨਹੀਂ ਹੋਣੀ ਚਾਹੀਦੀ। ਬੱਲੇ ਦੀ ਲੰਬਾਈ 96.4 ਸੈਂਟੀਮੀਟਰ ਤੋਂ ਜ਼ਿਆਦਾ ਨਹੀਂ ਹੋਣੀ ਚਾਹੀਦੀ।

ਮੈਚ ਵਿੱਚ ਧੋਨੀ ਅੱਠ ਗੇਂਦਾਂ ਵਿੱਚ ਸਿਰਫ਼ 12 ਦੌੜਾਂ ਹੀ ਬਣਾ ਸਕੇ ਅਤੇ ਉਨ੍ਹਾਂ ਦੀ ਟੀਮ ਦੋ ਦੌੜਾਂ ਨਾਲ ਮੈਚ ਹਾਰ ਗਈ। ਤੇਜ਼ ਗੇਂਦਬਾਜ਼ ਯਸ਼ ਦਿਆਲ ਨੇ ਆਖਰੀ ਓਵਰ ਵਿੱਚ 15 ਦੌੜਾਂ ਬਚਾਈਆਂ ਅਤੇ ਆਰਸੀਬੀ ਲਈ ਸ਼ਾਨਦਾਰ ਜਿੱਤ ਹਾਸਲ ਕੀਤੀ। ਇਸ ਜਿੱਤ ਨਾਲ, ਆਰਸੀਬੀ ਅੰਕ ਸੂਚੀ ਵਿੱਚ ਸਿਖਰ 'ਤੇ ਪਹੁੰਚ ਗਿਆ ਹੈ ਕਿਉਂਕਿ ਉਨ੍ਹਾਂ ਦੇ ਹੁਣ 11 ਮੈਚਾਂ ਤੋਂ ਬਾਅਦ ਕੁੱਲ 16 ਅੰਕ ਹਨ ਅਤੇ ਉਨ੍ਹਾਂ ਦਾ ਪਲੇਆਫ ਲਈ ਕੁਆਲੀਫਾਈ ਕਰਨਾ ਤੈਅ ਹੈ। ਦੂਜੇ ਪਾਸੇ, ਚੇਨਈ ਪਹਿਲਾਂ ਹੀ ਪਲੇਆਫ ਦੀ ਦੌੜ ਤੋਂ ਬਾਹਰ ਹੋ ਚੁੱਕੀ ਹੈ।