આજથી ST બસના ભાડામાં વધારો, જાણો કયા કયા રુટનું બસનું ભાડું કેટલું થયું

Gujarat Inflation સપના શર્મા/અમદાવાદ : ગુજરાતની જનતા પર મોંઘવારીનો વધુ એક માર પડ્યો છે.  આજથી ST બસમાં મુસાફરી મોંઘી બની છે. એસટી બસના ભાડામાં આજથી વધારો લાગુ કરવામાં આવ્યો છે. ભાડામાં 10 ટકાનો વધારો કરાતા ગુજરાતના 27 લાખ મુસાફરોને અસર કરશે.

ST બસની સવારી થઈ મોંધી! ગુજરાત ST બસના ભાડામાં 10 ટકાનો કરાયો વધારો#stbus #stbusfair #ticketfair #gujarat #zee24kalak pic.twitter.com/RFoYokTxY4

— Zee 24 Kalak (@Zee24Kalak) March 28, 2025

48 કિમી સુધીની મુસાફરીમાં રૂ. 1થી 4નો વધારો
GSRTC દ્વારા બસના ભાડામાં આજથી વધારો લાગુ કરાયો છે. આજથી એસટીની તમામ બસના ભાડામાં 10 ટકાનો વધારાનો સરકારે નિર્ણય લીધો છે. ST નિગમની તમામ લોકલ, એક્સપ્રેસ, ગુર્જરનગરી, સ્લીપર અને વોલ્વો બસના ભાડામાં આ વધારો લાગુ થશે. 48 KM સુધી 1 થી 4 રૂપિયાનો વધારો કરવામાં આવ્યો છે. આ પહેલા વર્ષ 2023 માં 25 ટકાનો વધારો ઝીંકાયો હતો. તેના બે વર્ષ બાદ સરકારે વધારો જાહેર કર્યો છે. 

કયા રુટમાં કેટલું ભાડું વધ્યું 

• અમદાવાદથી મહેસાણાનું ભાડું રૂ. 95થી વધીને રૂ.105
• અમદાવાદથી વડોદરાનું ભાડું રૂ.114થી વધીને રૂ.125
• અમદાવાદથી સુરતનું ભાડું રૂ.194થી વધીને રૂ.213
• અમદાવાદથી રાજકોટનું ભાડું રૂ.171થી વધીને રૂ.188
• અમદાવાદથી જામનગરનું ભાડું રૂ.216થી વધીને રૂ.238
• અમદાવાદથી ભાવનગરનું ભાડું રૂ.154થી વધીને રૂ.169
• અમદાવાદથી દાહોદનું ભાડું રૂ.165થી વધીને રૂ.182
• અમદાવાદથી ગોધરાનું ભાડું રૂ.121થી વધીને રૂ.133

27 લાખથી વધુ મુસાફરો કરે છે ST બસમાં મુસાફરી
દરરોજ 27.18 લાખ મુસાફરો એસ.ટી. બસમાં મુસાફરી કરે છે ગુજરાતમાં દરરોજ 18.21 લાખ ગ્રામીણ મુસાફરો, 46 હજાર શહેરી મુસાફરો અને 8.30 લાખ વિદ્યાર્થીઓ એમ કુલ મળીને 27.18 લાખ મુસાફરો રાજ્યની એસ.ટી. બસમાં મુસાફરી કરે છે. ગુજરાત સ્ટેટ રોડ ટ્રાન્સપોર્ટ કોર્પોરેશને (GSRTC)ની કુલ 8,320 બસ દરરોજ 42,083 જેટલી ટ્રીપ પૂરી કરે છે. તમામ બસોનું 34.52 લાખ કિલોમીટર જેટલું અંતર દરરોજ કાપે છે. ગુજરાતના 18,367 ગામડાઓ એટલે કે 99.34 ટકા ગામડાઓને એસ.ટી. નિગમે આવરી લીધા છે. રોજ સરેરાશ 68,000 ટિકિટ ઓનલાઇન બુક થાય છે.