Mysterious Village: દુનિયાનું સૌથી રહસ્યમયી ગામ, અહીં ધોળા દિવસે દેખાય વિચિત્ર આકૃતિઓ, વૈજ્ઞાનિકો પણ નથી જાણી શક્યા આ રહસ્ય વિશે

રશિયામાં એક એવું ગામ છે જેના રહસ્યોને વૈજ્ઞાનિકો સમજી શકતા નથી. આ ગામને એમ ટ્રાયેંગલ અથવા તો મોલ્યોબ્કા ટ્રાયેંગલ નામની ઓળખવામાં આવે છે. આ જગ્યા મોસ્કોથી 600 મીલ દુર આવેલું છે. આ જગ્યા ઉરાલ પર્વતો પાસે આવેલી છે. સ્થાનીક લોકો પહેલા આ જગ્યાને પવિત્ર માનતા હતા પરંતુ સમયની સાથે આ જગ્યા તેની રહસ્યમયી ઘટનાના કારણે ચર્ચામાં રહેવા લાગી.  

આ જગ્યાને પર્મ વિષમ ઝોન પણ કહેવામાં આવે છે જે 70 વર્ગ મીલમાં ફેલાયેલી છે. 1980 માં પહેલીવાર આ જગ્યા ત્યારે ચર્ચામાં આવી જ્યારે અહીં વિચિત્ર અવાજો સંભળાવા લાગ્યા. અહીં ટ્રાફિકનો અવાજ આવતો હોય તેવા અવાજ રેકોર્ડ કરવામાં આવ્યા. જો કે અહીંની સૌથી નજીકનો રોડ પણ 40 કિમી દુર છે તેવામાં ટ્રાફિકનો અવાજ ગામમાં કેવી રીતે આવે તો રહસ્ય બની ગયું.  

અહીં આકાશના પ્રકાશમાં પણ વિચિત્ર આકૃતિઓ દેખાય છે. પ્રકાશની રહસ્યમયી કિરણોથી જંગલોમાં પારદર્શક આકૃતિઓ દેખાય છે. ઘણીવાર વિચિત્ર ચિન્હો આકાશમાં બનેલા દેખાય છે. કેટલાક લોકોએ અહીં યૂએફઓ જોયાનો પણ દાવો કર્યો છે. માન્યતા એવી પણ છે કે અહીં રહેનારની બુદ્ધિમત્તા વધી જાય છે અને બીમાર વ્યક્તિ સાજા થઈ જાય છે.   

સૌથી ચોંકાવનારી વાત એ છે કે અહીં દરેક કંપનીના મોબાઈલ નેટવર્ક કંપનીઓના ટાવર છે પરંતુ તેમ છતા ગામમાં મોબાઈલ કામ નથી કરતાં. બસ એક ટેકરી છે જેને કોલ બોક્સ કહેવાય છે ત્યાંથી કોલ કનેક્ટ થાય છે. કોઈ વ્યક્તિ આ ટેકરી પર જઈ કોલ કરે તો દુનિયાના કોઈપણ ખૂણે વાત થાય. પરંતુ ટેકરી પરથી નીચે ઉતરવાની સાથે કોલ કટ થઈ જાય છે.   

આ ઘટનાઓના કારણે એમ ટ્રાયેંગલ ગામ આજે પણ રહસ્યમયી છે. વૈજ્ઞાનિકોએ અહીં ઘણી શોધ કરી છે પરંતુ કોઈ ઠોસ જવાબ મળ્યો નથી. આ જગ્યાને લોકો અનોખી માને છે.