રાજકિય સન્માન સાથે વિજય રૂપાણીને અપાઈ અંતિમ વિદાઈ, પૂર્વ CM પંચમહાભૂલમાં વિલીન

વિજય રૂપાણીની અંતિમ યાત્રામાં આ રાજકોટ ભાજપના તમામ નેતાઓ સહિત વિપક્ષના નેતાઓ પણ પહોંચ્યા છે. આ ઉપરાંત મોટી સંખ્યામાં રાજકોટવાસીઓ તેમના લોક લાડીલા નેતાને અંતિમ વિદાય આપવા માટે પહોંચ્યા છે. વિજય રૂપાણીના આકસ્મિક મૃત્યુથી રાજકોટવાસીઓ ઘેરા આઘાતમાં છે અને સમગ્ર રાજકોટ શહેરમાં એક ગમગીની છવાઈ ગઈ છે.

રૂપાણી પરિવારને પાર્થિવદેહ સોંપવામાં આવ્યો હતો. ત્યાર બાદ 2.30 વાગ્યે પરિવાર હીરાસર એરપોર્ટ પહોંચ્યો હતો. જ્યાંથી તેમને ગ્રીનલેન્ડ ચોકડી અને ત્યાર બાદ વિવિધ વિસ્તારો થઈને નિર્મલા રોડ પરની પ્રકાશ સોસાયટીમાં આવેલા તેમના નિવાસસ્થાને લઈ જવામાં આવ્યા હતા.

આજે રાજકોટના વિવિધ માર્ગો પરથી વિજય રૂપાણીની અંતિમ યાત્રા નીકળી હતી, એ સમયે સમગ્ર રાજકોટવાસીઓ તેમના અંતિમ દર્શન માટે ઉમટ્યા હતા. પોતાના માનીતા નેતાની અણધારી વિદાય છે રાજકોટવાસીઓ ઘેરા શોકમાં ડૂબ્યા છે અને અશ્રુભીની આંખે શ્રદ્ધાંજલિ આપતા જોવા મળ્યા હતા.

પૂર્વ મુખ્યમંત્રી પાર્થિવ દેહ એર એમ્બ્યુલન્સ દ્વારા રાજકોટ લઈને આવવામાં આવ્યો હતો. સાંજે તેમની અંતિમયાત્રા નિકળી ત્યારે મોટી સંખ્યામાં લોકો એકઠા થયા હતા અને આખું રાજકોટ જાણે હિબકે ચઢ્યું હોય તેવા દ્રશ્યો સર્જાયા હતા.

ગ્રીન લેન્ડ ચોકડીથી તેમના નિવાસ સ્થાને તેમનો પાર્થિવ દેહ લઈ જવામાં આવ્યો હતો. જેમા ગ્રીન લેન્ડ ચોકડી ખાતે હજારોની સંખ્યામાં લોકો એકઠા થયા હતા. ફૂલોથી શણગારવામાં આવેલી શબવાહિનીમાં વિજયભાઈના પાર્થિવદેહને રાખવામાં આવ્યો હતો.  

અંતિમયાત્રા કાઢ્યા બાદ વિજય રૂપાણીને ગાર્ડ ઓફ ઓનરથી સન્માનિત કરવામાં આવ્યા હતા.ત્યારે કેન્દ્રીય ગૃહમંત્રી અમિત શાહ અને મુખ્યમંત્રી ભૂપેન્દ્ર પટેલ પણ ત્યા હાજર રહ્યા હતા અને મોટી સંખ્યામાં લોકોએ તેમને શ્રદ્ધાંજલિ આપી હતી.

બે કલાક ચાલેલી સ્મશાનયાત્રામાં હૈયેહૈયું દળાય એટલી ભીડ જામી હતી. તેમજ રાજકોટવાસીઓ તેમના પ્રિય નેતા વિજય રૂપાણીના અંતિમ દર્શન કરવા અને અંજલિ આપવા માટે લાઇનો લગાવી હતી. વરસતા વરસાદમાં પણ વિજયભાઈને વિદાય આપવા લોકોની ભીડ જામતી જતી હતી.

ઉલ્લેખનીય છે કે પ્લેનક્રેશમાં તેમનું નિધન થયા બાદ 70 કલાક પછી તેમનું DNA મેચ થયું અને તેમનો પાર્થિવ દેહ પરિવારને સોંપવામાં આવ્યો. આજે રાજકીય સન્માન સાથે તેમની અંતિમવિધી કરવામાં આવી હતી. જેમા ભાજપના દિગ્ગજ નેતાઓએ હાજરી આપી હતી.