ଶୋକରେ ବୁଡିଲା ଓଡ଼ିଶା ଯାତ୍ରାଜଗତ, ଦୁର୍ଘଟଣାରେ ପ୍ରାଣ ହରାଇଲେ ଏହି କଳାକାର

Accident News: ସ୍କୁଟି ଭାରସାମ୍ୟ ହରାଇବା କାରଣରୁ ଦୁଇ ଯାତ୍ରା ଅଭିନେତ୍ରୀ ଏକ ବ୍ରିଜ ଉପରୁ ପ୍ରାୟ ୨୦ ଫୁଟ ତଳେ ଖସି ପଡିଥିଲେ । ଫଳରେ ଦୁଇଜଣଙ୍କୁ ଗୁରୁତର ଆହତ ଅବସ୍ଥାରେ ତୁରନ୍ତ ଉଦ୍ଧାର କରାଯାଇ ହସ୍ପିଟାଲରେ ଭର୍ତ୍ତି କରାଯାଇଥିଲା ।

ଭୁବନେଶ୍ୱର: ୧୬ ମାର୍ଚ୍ଚ ରବିବାର ଦିନ ଭୋର ସମୟରେ ଏକ ବଡ଼ ଦୁର୍ଘଟଣା ଘଟିବା କାରଣରୁ ଜଣେ ଲୋକପ୍ରିୟ ଯାତ୍ରା ଅଭିନେତ୍ରୀଙ୍କ ମୃତ୍ୟୁ ହୋଇଛି । ସୂଚନା ମୁତାବକ, ସୋର ଥାନା ୧୬ନଂ ଜାତୀୟ ରାଜପଥ ଦହିସଡା ସାଧନା ହୋଟେଲ ନିକଟରେ ଏକ ଦୁର୍ଘଟଣା ଘଟିଥିଲା । ଏକ ସ୍କୁଟି ଭାରସାମ୍ୟ ହରାଇବା କାରଣରୁ ଦୁଇ ଯାତ୍ରା ଅଭିନେତ୍ରୀ ଏକ ବ୍ରିଜ ଉପରୁ ପ୍ରାୟ ୨୦ ଫୁଟ ତଳେ ଖସି ପଡିଥିଲେ । ଫଳରେ ଦୁଇଜଣଙ୍କୁ ଗୁରୁତର ଆହତ ଅବସ୍ଥାରେ ତୁରନ୍ତ ଉଦ୍ଧାର କରାଯାଇ ହସ୍ପିଟାଲରେ ଭର୍ତ୍ତି କରାଯାଇଥିଲା । ଦୁର୍ଘଟଣାର ସମ୍ମୁଖୀନ ହୋଇଥିବା ଦୁଇ ଯାତ୍ରା ଅଭିନେତ୍ରୀଙ୍କ ନାମ ହେଉଛି ବାଲେଶ୍ୱର ବୁରୁଦା ଅଞ୍ଚଳର ଝିଲି ସାହାଣୀ ଏବଂ ପାଣିକୋଇଲି ଅଞ୍ଚଳର ପାୟଲ ପଣ୍ଡା। ଦୁର୍ଘଟଣାରେ ପାୟଲଙ୍କ ମୃତ୍ୟୁ ହୋଇଥିବା ସମୟରେ ଝିଲି ବର୍ତ୍ତମାନ ଗୁରୁତର ଅବସ୍ଥାରେ ଚିକିତ୍ସିତ ହେଉଛନ୍ତି ।

ଖବର ମୁତାବକ, ପାୟଲଙ୍କୁ କଟକ ବଡ଼ ମେଡିକାଲରେ ଭର୍ତ୍ତି କରାଯାଇ ଆଇସିୟୁରେ ଭେଣ୍ଟିଲେଟର ଚିକିତ୍ସା କରାଯାଉଥିଲା । ଦୁର୍ଘଟଣା ଖବର ପ୍ରଚାରିତ ହେବା ପରେ ଉତ୍କଳ କଳାକାର ଏକାଡେମୀ ଓଡ଼ିଶାର ରାଜ୍ୟ ସଭାପତି ସୁଜାତା ମିଶ୍ର କିଛି କଳାକାରଙ୍କ ସହ ଆଲୋଚନା କରିଥିଲେ । ଏଥିସହ ଉତ୍କଳ କଳାକାର ଏକାଡେମୀ ଓଡ଼ିଶାର ରାଜ୍ୟ ଆବାହିକା କୁସୁମ ମଞ୍ଜରି, ପ୍ରତିଷ୍ଠାତା କୈଳାଶ ଚନ୍ଦ୍ର ନାୟକ ଏବଂ ସ୍ମୃତି ପ୍ରମୁଖ ତୁରନ୍ତ ହସ୍ପିଟାଲରେ ପହଞ୍ଚି ପାୟଲଙ୍କ ସ୍ୱାସ୍ଥ୍ୟବସ୍ଥା ସମ୍ପର୍କରେ ପଚାରି ବୁଝିଥିଲେ । ଡାକ୍ତର କହିଥିଲେ ଯେ, ପାୟଲଙ୍କ ଅବସ୍ଥା ଅତ୍ୟନ୍ତ ଗୁରୁତର ଏବଂ ତାଙ୍କୁ ପ୍ରାୟ ୭୨ ଘଣ୍ଟା ପର୍ଯ୍ୟନ୍ତ ଅବଜରଭେସନରେ ରଖିବା ପରେ କିଛି କହିହେବ । କିନ୍ତୁ ଡାକ୍ତରଙ୍କ ଚମସ୍ତ ଚେଷ୍ଟା ସତ୍ୱେ ପାୟଲଙ୍କ ଜୀବନ ବଞ୍ଚାଇବା ସମ୍ଭବ ହୋଇପାରିଲା ନାହିଁ । ଭୋର ପ୍ରାୟ ୪ଟା ୪୦ ମିନିଟ୍ ସମୟରେ ପାୟଲଙ୍କ ମୃତ୍ୟୁ ହେବା ପରେ ଖବର ପ୍ରଚାରିତ ହୋଇଥିଲା ଫଳରେ ଓଡ଼ିଶା ଯାତ୍ରା ଜଗତରେ ଶୋକର ଛାୟା ଖେଳିଯାଇଛି । ପାୟଲଙ୍କ ପରିବାର ସଦସ୍ୟଙ୍କ ଆଖିରୁ ଲୁହ ଶୁଖୁନି । ପାୟଲଙ୍କ ସ୍ୱାମୀ ଏବଂ ୨ ଭଉଣୀ ଖବର ପାଇ ହସ୍ପିଟାଲରେ ପହଞ୍ଚିଥିଲେ ।

ଅଭିନେତ୍ରୀ ପାୟଲ ଅନେକ ପ୍ରମୁଖ ଯାତ୍ରା ଅନୁଷ୍ଠାନରେ ନିଜର କଳା ପରିବେଷଣ କରି ଲୋକପ୍ରିୟତା ହାସଲ କରିଥିଲେ । ଅନେକ ନାଟକରେ ସେ ଅଭିନୟ କରି ଦର୍ଶକଙ୍କ ହୃଦୟ ଜିଣିବାରେ ସକ୍ଷମ ହୋଇଥିଲେ । ପାୟଲଙ୍କ ମୃତ୍ୟୁରେ ଅନେକ ଯାତ୍ରା କଳାକାର ଦୁଃଖ ପ୍ରକାଶ କରିଛନ୍ତି । ଏଥିସହ ପାୟଲଙ୍କ ଉଦ୍ଦେଶ୍ୟରେ ଶ୍ରଦ୍ଧାଞ୍ଜଳୀ ଅର୍ପଣ କରିବା ସହ ଅମର ଆତ୍ମାର ସଦଗତୀ କାମନା କରିଛନ୍ତି ।

ଅନ୍ୟପଟେ, ଅଭିନେତ୍ରୀ ଝିଲିଙ୍କ ଅବସ୍ଥା ଗୁରୁତର ରହିଛି । ସେ ମଧ୍ୟ ହସ୍ପିଟାଲରେ ଚିକିତ୍ସାଧିନ ଅଛନ୍ତି । ଝିଲିଙ୍କ ପାଇଁ ଆଶୁ ଆରୋଗ୍ୟ କାମନା କରିଛନ୍ତି ଯାତ୍ରାସହ ଜଡିତ ଅନେକ ସଦସ୍ୟ । ଆପଣଙ୍କୁ କହିରଖୁଛୁ ଯେ, ଦୁର୍ଘଟଣା ପରେ ପୋଲିସ ମଧ୍ୟ ଦୁର୍ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିବା ସୂଚନା ମିଳିଛି । ତେବେ ପ୍ରକୃତରେ କେଉଁ ପରିସ୍ଥିତିରେ ଏପରି ଦୁର୍ଘଟଣା ଘଟିଲା ତାର ପ୍ରକୃତ ସତ୍ୟ ସାମ୍ନାକୁ ଆସିନାହିଁ ।