PNBએ ખાતાધારકોને આપી મોટી ભેટ ! હવે ગ્રાહકોએ નહીં ચૂકવવો પડે આ ચાર્જ

PNB penalty charges : જાહેર ક્ષેત્રની પંજાબ નેશનલ બેંક (PNB)એ તેના ગ્રાહકોને મોટી રાહત આપી છે. હકીકતમાં બેંકે તમામ બચત ખાતાઓમાં લઘુત્તમ સરેરાશ બેલેન્સ (MAB) ના જાળવવા બદલ લાગતો દંડ નાબૂદ કર્યો છે. PNBએ જણાવ્યું હતું કે 1 જુલાઈ, 2025થી અમલમાં આવેલી આ પહેલ ખાસ કરીને મહિલાઓ, ખેડૂતો અને ઓછી આવક ધરાવતા પરિવારો જેવા પ્રાથમિકતા વર્ગોને ટેકો આપવા માટે છે. 

બેંકના CEOએ શું કહ્યું ?

PNBના મેનેજિંગ ડિરેક્ટર (MD) અને ચીફ એક્ઝિક્યુટિવ ઓફિસર (CEO) અશોક ચંદ્રાએ કહ્યું - આ નિર્ણય સમાવેશી બેંકિંગ પ્રત્યેની અમારી અડગ પ્રતિબદ્ધતાને પ્રતિબિંબિત કરે છે. અમારું માનવું છે કે આ ચાર્જ માફ કરવાથી ગ્રાહકો પર નાણાકીય દબાણ ઘટશે અને ઔપચારિક બેંકિંગ ઇકોસિસ્ટમમાં વધુ ભાગીદારીને પ્રોત્સાહન મળશે.

બેંકો તેમના ખાતામાં લઘુત્તમ સરેરાશ બેલેન્સ જાળવવાનું કહે છે જેથી તેઓ તેમના સંચાલન ખર્ચાઓ પૂરા કરી શકે અને ઓનલાઈન બેંકિંગ, એટીએમ, શાખા વગેરે જેવી વિવિધ સેવાઓનો ખર્ચ ઉઠાવી શકે. ઘણી વખત, બેંકો ગ્રાહકોને લઘુત્તમ બેલેન્સ જાળવવા પર ઊંચા વ્યાજ દર, મફત એટીએમ વ્યવહારો જેવી સુવિધાઓ પણ પૂરી પાડે છે.

બેંકો તેમના ગ્રાહકો પાસેથી લઘુત્તમ બેલેન્સ ના રાખવા બદલ દંડ વસૂલ કરે છે. ઘણી વખત, જો લાંબા સમય સુધી લઘુત્તમ સરેરાશ બેલેન્સ ના જાળવવામાં આવે તો બેંકો ખાતું બંધ પણ કરી દે છે. વ્યાપક રીતે કહીએ તો, બેંકો એક વ્યવસાય છે, જે તેના ખર્ચાઓને પહોંચી વળવા માટે થાપણો અને દંડ પર આધાર રાખે છે.

વિદ્યાલક્ષ્મી યોજના પર રાહત

તાજેતરમાં પંજાબ નેશનલ બેંકે વિદ્યાલક્ષ્મી યોજના હેઠળ શિક્ષણ લોન પર વ્યાજ દરમાં 0.2 ટકાનો ઘટાડો કર્યો છે. PNBએ કહ્યું કે આ પહેલ શિક્ષણની ઍક્સેસ વધારવા માટે બેંકની પ્રતિબદ્ધતાને વધુ મજબૂત બનાવે છે. વિદ્યાલક્ષ્મી યોજના ગુણવત્તાયુક્ત ઉચ્ચ શિક્ષણ માટે વિદ્યાર્થીઓને વ્યાપક નાણાકીય સહાય પૂરી પાડવા માટે બનાવવામાં આવી છે. પીએનબીએ જણાવ્યું હતું કે સુધારા પછી, સંસ્થાઓના આધારે શિક્ષણ લોન 7.5 ટકાથી શરૂ થશે.