પોલીસની નોકરી સાથે પૂર્ણ કર્યું પોતાનું સપનું, આ ફિલ્મમાં કર્યો અભિનય, જાણો કોણ છે કોન્સ્ટેબલ શીતલ પટેલ

Rajkot News: રાજકોટ શહેર પોલીસ કમિશનરના ફિંગર પ્રિન્ટ વિભાગમાં ફરજ બજાવનારી મહિલા કોન્સ્ટેબલ શીતલ પટેલ હાલ પોતાની રીલ અને રીયલ લાઇફ માટે ચર્ચાનું કેન્દ્ર બની છે. ડિસિપ્લિનરી ફોર્સમાં કામકાજ કરતા કરતા એક મહિલા કોન્સ્ટેબલ ફિલ્મ જગતમાં પગ માંડ્યો હોય તેવો કદાચ પ્રથમ બનાવ બન્યો હોવાનું સામે આવ્યું છે. પોતાના પિતાનું સ્વપ્ન સાકાર કરતા કરતા શીતલ પટેલે પોતાનું સ્વપ્ન પણ સાકાર કર્યું હોવાનું સામે આવ્યું છે. ત્યારે શું છે શીતલ પટેલની કહાની તમે પણ જાણો...

થોડા સમય પૂર્વે ગુજરાતી ફિલ્મ આવી હતી જેનું નામ હતું રણભૂમિ. રણભૂમિ ફિલ્મ કચ્છના એક નાનકડા એવા ગામમાં શૂટ કરવામાં આવી હતી. ફિલ્મની કહાની કંઈક એવી છે કે, ગામની દીકરી શહેરમાં ભણવા ગણવા માટે જાય છે અને ત્યારબાદ તે પોતાના ગામ ખાતે પરત આવે છે. તેમજ ત્યારબાદ પોતાના ગામની સરપંચ બને છે અને ગામની કાયાપલટ કરે છે. ત્યારે મહિલા સશક્તિકરણ ઉપર બનેલી આ ફિલ્મને લઈ તેની લીડ એક્ટ્રેસ અને રાજકોટ શહેર પોલીસ કમિશનર કચેરીના ફિંગર પ્રિન્ટ વિભાગમાં ફરજ બજાવનારી શીતલ પટેલ હાલ ચર્ચાનું કેન્દ્ર બને છે. ડિસિપ્લિનરી ફોર્સ સાથે જોડાયેલી શીતલ પટેલે થોડા મહિનાઓ પૂર્વે રિલીઝ થયેલી ફિલ્મ રણભૂમિમાં લીડ એક્ટ્રેસની ભૂમિકા ભજવી હોવાનું સામે આવ્યું છે. 

પોલીસ કોન્સ્ટેબલથી સિનેમા સ્ક્રીન સુધીની સફર! ગુજરાતની આ મહિલા પોલીસ કોન્સ્ટેબલે જાણીતી ફિલ્મમાં લીડ એક્ટ્રેસની ભૂમિકા ભજવી#viralvideo #rajkot #womenpoliceconstable #womenpolice #trendingvideo #gujarat pic.twitter.com/7OMViVxJkn

— Zee 24 Kalak (@Zee24Kalak) May 2, 2025

આ પણ વાંચોઃ ગુજરાતની મુસ્લિમ યુવતીને પાકિસ્તાન પર પ્રેમ ઉભરાયો, કરી એવી પોસ્ટ કે શરૂ થયો વિવાદ

વર્ષ 2017 થી ગુજરાત પોલીસમાં અને રાજકોટ ખાતે ફરજ બજાવનારી મહિલા કોન્સ્ટેબલ શીતલ પટેલે જણાવ્યું હતું કે, મારા પિતા ગત જુન મહિનામાં જ શિક્ષણ વિભાગમાંથી રીટાયર્ડ થયા છે. ત્યારે મારા પિતાનું સ્વપ્ન હતું કે હું પણ તેમની જેમ સરકારી નોકરી મેળવવું અને સમાજની સેવા કરું. ત્યારે પિતાનુ સ્વપ્ન પૂર્ણ કરવા માટે મેં ગુજરાત પોલીસમાં ભરતી થવાનો નિર્ણય લીધો હતો. તેના માટે કપરામાં કપરી શારીરિક કસોટી પણ પાર કરવા માટે મહેનત કરી હતી. તેમજ શરૂઆતનું મારુ પોસ્ટિંગ રાજકોટ શહેરના યુનિવર્સિટી પોલીસ સ્ટેશનમાં થયું હતું. તેમજ ત્યારબાદ મારુ પોસ્ટિંગ રાજકોટ શહેર પોલીસ કમિશનર કચેરીના ફિંગર પ્રિન્ટ વિભાગમાં થયું છે. પિતાનું સ્વપ્ન પૂર્ણ કરવા માટે હું પોલીસમાં ભરતી થઈ હતી. પરંતુ મારી વ્યક્તિગત લાગણી અને મારું સ્વપ્ન ફિલ્મમાં કામ કરવાનું હતું. હું જ્યારે અભ્યાસ કરતી હતી તે સમયે પણ નાટકોમાં ભાગ લેવો મને ખૂબ જ ગમતો હતો. ત્યારે રણભૂમિની લીડ એક્ટ્રેસ સહિતનાઓ બાબતેની જાહેરાત મે ન્યુઝ પેપરમાં વાંચી હતી. ત્યારબાદ મેં અમદાવાદ ખાતે ઓડીશન પણ આપ્યું હતું જેમાં હું સિલેક્ટ થતા અંદાજિત એક મહિના જેટલો સમય ફિલ્મના શૂટિંગમાં લાગ્યો હતો. 

ફિલ્મમાં કામ કરવા માટે મારે ગૃહ વિભાગમાંથી ખાસ મંજૂરી પણ મેળવવી પડી હતી. જેના માટે મારા પીઆઈ, ડીસીપી તેમજ શહેર પોલીસ કમિશનર સહિતનાઓનો મને સાથ તેમજ સહકાર મળ્યો હતો. મારા ઉપરી અધિકારીઓએ માત્ર એટલું કહ્યું હતું કે, ખાખીને ડાઘ ન લાગે તે જોજો અને પ્રોટોકોલમાં રહીને કામકાજ કરજો. 

રાજકોટ: પોલીસની નોકરી સાથે પૂર્ણ કર્યું પોતાનું સપનું, આ ફિલ્મમાં કર્યો અભિનય, જાણો કોણ છે કોન્સ્ટેબલ શીતલ પટેલ#gujarat #rajkot #news #zee24kalak pic.twitter.com/v2rUzS0H6D

— Zee 24 Kalak (@Zee24Kalak) May 2, 2025

ફિલ્મ રણભૂમિ મહિલા સશક્તિકરણનું સુંદર ઉદાહરણ પૂરું પાડે છે. ફિલ્મ રણભૂમિમાં મારા પાત્રનું નામ લીલા છે. મેં ગામની સરપંચ તરીકે ભૂમિકા ભજવી છે. તેમજ ગામની મહિલાઓ કઈ રીતે પોતાના પગ ઉપર ઊભી થઈ છે તેમજ શાસ્ત્રની સાથે શસ્ત્રનું પણ પ્રદર્શન મહિલાઓ દ્વારા કરવામાં આવ્યું છે. 

આ પણ વાંચોઃ Photos: અમદાવાદના વટવામાં લાગી ભીષણ આગ, મેજર કોલ જાહેર, 19થી વધુ ફાયરની ગાડીઓ પહોંચી

ખાસ કરીને ડિસિપ્લિનરી ફોર્સ સાથે જોડાયેલી મહિલા પોલીસને મારે એટલી જ અપીલ કરવાની છે કે, ડિસિપ્લિનરી ફોર્સ માં આવ્યા બાદ પણ આપણે આપણા જે સ્વપ્ન હોય છે તે સાકાર કરી શકીએ છીએ. હું વિનંતી કરું છું કે, આપણામાંથી કોઈ એક ક્યારેય પોતાના સ્વપ્નોને મારી ન નાખવા જોઈએ તેમજ પોતાના સ્વપ્નો કઈ રીતે સાકાર કરી શકાય તે તરફ પ્રયત્ન કરવા જોઈએ. 

ફિલ્મ રણભૂમિ કર્યા બાદ મારી પાસે અનેક ફિલ્મની ઓફર પણ આવી હતી. પરંતુ મારી એક બાબત નક્કી છે કે મારે માત્ર અને માત્ર ગુજરાતી ભાષા માટે, ગુજરાતી ફિલ્મ માટે, ગુજરાતી કલા જગત માટે કામ કરવું છે. આગામી સમયમાં પણ જો કોઈ સારી સ્ક્રિપ્ટ મારી પાસે લઈને આવશે તો હું ચોક્કસ તે અંગે વિચારીશ અને ભવિષ્યમાં પણ હું ફિલ્મી પડદે જોવા મળીશ.