ગુજરાતમાં આજે અતિભારે વરસાદની આગાહી : 10 જિલ્લાઓને અપાયું મોટું એલર્ટ

આગામી 3 કલાક માટે હવામાન વિભાગે નાવકાસ્ટ બુલેટીન જાહેર કર્યું છે. બપોર સુધી રાજ્યમાં વરસાદની આગાહી છે. જે મુજબ છોટાઉદેપુર, નર્મદા, તાપી, સુરત, નવસારી, વલસાડ, ડાંગ, દમણ, દાદરા અને નગર હવેલીમાં ઓરેન્જ અલર્ટ સાથે ભારે વરસાદની આગાહી છે. અમદાવાદ સહિત પૂર્વ અને ઉત્તર ગુજરાતમાં યલો અલર્ટ સાથે હળવા વરસાદની આગાહી છે.   

હવામાન નિષ્ણાંત અંબાલાલ પટેલની આગાહી ગુજરાતના વરસાદમાં અપડાઉન લાવે તેવી છે. તેમણે કહ્યું કે, ગુજરાતમાં વરસાદનું પ્રમાણ ધીરે ધીરે ઘટશે. 29 જૂલાઈ સુધી વરસાદ યથાવત રહેશે. બંગાળના ઉપસાગરમાંથી આવેલો ભેજ ગુજરાતમાં ફરી વરસાદ લાવશે. 3 ઓગસ્ટથી મોટા ફોરાનો વરસાદ પડશે. તો 6 થી 10 ઓગસ્ટ દક્ષિણ ગુજરાતમાં ભારે વરસાદ પડશે. આ કારણે તાપી નદીનું જળસ્તર વધવાની શક્યતા છે.   

તેમણે કહ્યું કે, વરસાદી સિસ્ટમ ઉત્તર ભારત તરફ જશે. 18 થી 20 ઓગસ્ટ દરમિયાન ગુજરાતમાં વરસાદનો ફરી મોટો રાઉન્ડ આવશે. 23 ઓગસ્ટથી પર્વતાકાર વરસાદ પડશે. જ્યાં ચઢે ત્યાં વરસાદ પડે તેવી સ્થિતિ સર્જાશે. ગણેશ ચતુર્થીના તહેવાર દરમિયાન પણ વરસાદી માહોલ રહેશે. ફરી 27 થી 30 ઓગસ્ટ દરમિયાન સારો વરસાદ રહેશે. 3 સપ્ટેમ્બરથી 14 સપ્ટેમ્બર દરમિયાન વિવિધ વિસ્તારમાં વરસાદ પડશે. 

અંબાલાલ પટેલે જન્માષ્ટમી દરમિયાન સામાન્ય વરસાદની આગાહી કરી છે. તેમણે કહ્યું કે, સૌરાષ્ટ્રમાં જન્માષ્ટમી દરમિયાન લોકો મેળાની મજા માણી શકશે. જન્માષ્ટમી દરમિયાન વરસાદી ઝાપટા પડી શકે છે. ઓગસ્ટના અંતમાં ગણેશ ચતુર્થી દરમિયાન વરસાદ રહેશે.

હવામાન વિભાગના ડાયરેક્ટર એ.કે. દાસે આગામી 7 દિવસ રાજ્યમાં સાર્વત્રિક વરસાદની આગાહી કરી છે. તેમણે કહ્યું કે, આગામી 2 દિવસ ગુજરાત પ્રદેશમાં ભારેથી અત્યંત ભારે વરસાદ રહેશે. આગામી 5 દિવસ દરિયો તોફાની બનશે. માછીમારોને આગામી 1 ઓગસ્ટ સુધી દરિયો ન ખેડવા ચેતવણી અપાઈ છે. હાલમાં 3 સિસ્ટમ સક્રિય થતા દક્ષિણ ગુજરાતમાં બારે મેઘ ખાંગાની સ્થિતિ સર્જાઈ શકે છે. અમદાવાદમાં ગાજવીજ સાથે મધ્યમથી ભારે વરસાદની આગાહી છે.  

આ સીઝનમાં સરેરાશ કરતા વધુ વરસાદ વરસ્યો છે. આંકડા પર નજર કરીએ તો, દેશમાં સામાન્ય કરતા 7 ટકા વધુ વરસાદ રહ્યો. ગુજરાતમાં સરેરાશ કરતા 35 ટકા વધુ વરસાદ નોંધાયો. રાજસ્થાનમાં સરેરાશ કરતા 92 ટકા વધારે વરસાદ નોંધાયો.

ભારતીય હવામાન વિભાગે જાહેર કર્યા આંકડા હવામાન વિભાગના આંકડા અનુસાર, આ વર્ષે અત્યાર સુધી રાજસ્થાન, લદ્દાખ, નાગાલેન્ડ, મણિપુર અને સિક્કિમમાં સૌથી વધુ વરસાદ પડ્યો. મધ્ય પ્રદેશ, ગુજરાત, ઝારખંડમાં પણ સામાન્ય કરતા વધુ વરસાદ પડ્યો. જો કે, આ વર્ષ ભલે સરેરાશ કરતા વધુ વરસાદ પડ્યો પરંતુ તેમાં અસમાનતા જોવા મળી રહી છે. કેટલાક વિસ્તારોમાં 90 ટકાથી વધારે વરસાદ પડ્યો છે, તો અરુણાચલ પ્રદેશ, દિલ્લી, બિહાર, મહારાષ્ટ્રમાં સરેરાશ કરતા વધુ વરસાદ નોંધાયો છે.