પુલ હોનારતમાં હજી સુધી મૃતદેહ ન મળતા વિક્રમસિંહનું એ જ બ્રિજ પાસે પૂતળું બાળી અંતિમ ક્રિયા કરાઈ

મુજપુર-ગંભીરા બ્રિજ તૂટી પડતાં સર્જાયેલી ભયાનક દુર્ઘટનામાં મૃત્યુઆંક 20 પર પહોંચી ગયો છે. ઘટનાને લઇ તંત્ર દ્વારા સર્ચ ઓપરેશન સતત ચાલુ રાખવામાં આવ્યું છે. હાલ કાટમાળ નીચે ફસાયેલા એક મૃતદેહને બહાર કાઢવા માટે રેસ્ક્યુ ટીમો પ્રયત્નશીલ છે. NDRF અને SDRFની ટીમો સતત નદીમાં તપાસ ચલાવી રહી છે. પરંતુ ભારે પ્રવાહ અને કાટમાળ વચ્ચે કાર્યને આગળ વધારવામાં મુશ્કેલીઓ આવી રહી છે. ઘટનાને લઇ આસપાસના ગામોમાં શોકનું મોજુ ફેલાયું છે. તંત્ર દ્વારા સમગ્ર ઘટનાની ઊંડાણપૂર્વક તપાસ શરૂ કરવામાં આવી છે.

આજે છઠા દિવસે પણ નરસિંહપુરાના યુવકના મૃતદેહની શોધખોળ ચાલુ છે. મહીસાગર નદીમાં ગ્રામજનોએ બોટ લઈને વિક્રમના મૃતદેહની તપાસ આરંભી છે. ગામલોકો મૃતદેહ શોધવા બોટ લઇ નીકળી પડ્યા છે. છેક, 22 કિલોમીટર સુધી નદીમાં તપાસ કરી, પરંતું કંઈ હાથ લાગ્યુ નથી.

આ મામલે ZEE 24 કલાકને ધારાસભ્ય ચૈતન્યસિંહ ઝાલાએ જણાવ્યું કે, “હજુ સુધી રેસ્ક્યુ કામગીરી ચાલુ છે અને જવાબદાર અધિકારીઓ સામે પગલાં લેવામાં આવ્યા છે. અત્યાર સુધીમાં ચાર અધિકારીઓને સસ્પેન્ડ કરવામાં આવ્યા છે અને જો હજુ કોઇ અધિકારી જવાબદાર હશે તો તેની સામે પણ કડક કાર્યવાહી કરવામાં આવશે.”

આ વિશે જિલ્લા કલેક્ટર અનિલ ધમેલીયાએ કહ્યું કે, હજુ એક વ્યક્તિનો મૃતદેહ બ્રિજના કાટમાળમાં ફસાયો છે. NDRF અને SDRFની ટીમો કાટમાળ દૂર કરીને મૃતદેહને બહાર કાઢવા માટે પ્રયાસ કરી રહી છે. નદીના જળપ્રવાહ અને ઝેરી રસાયણિક તત્વોના લીધે રેસ્ક્યુ ઓપરેશનની ગતિ ધીમી પડી છે. છતાં બચાવ કામગીરી ચાલી રહી છે.