Nicholas Pooran Retirement: ୨୯ ବର୍ଷ ବୟସରେ ଅନ୍ତର୍ଜାତୀୟ କ୍ରିକେଟରୁ ଅବସର ନେଲେ ଏହି ଷ୍ଟାର ବ୍ୟାଟ୍ସମ୍ୟାନ୍, ସମସ୍ତେ ଆଶ୍ଚର୍ଯ୍ୟ

ନିକୋଲାସ୍ ପୁରନ୍ କହିଛନ୍ତି ଯେ ସେ ଅବସର ନେବା ପୂର୍ବରୁ ବହୁତ ଚିନ୍ତା କରିଥିଲେ ଏବଂ ଏହା ପରେ ଭାରୀ ହୃଦୟରେ ନିଷ୍ପତ୍ତି ନେଇଥିଲେ ଯେ ଏବେ ସମୟ ଆସିଯାଇଛି।

ସେ ଲେଖିଛନ୍ତି, "ଆମେ ଭଲ ପାଉଥିବା ଏହି ଖେଳ ଆମକୁ ବହୁତ ଖୁସି ଦେଇଛି ଏବଂ ଆଗକୁ ମଧ୍ୟ ଦେବ। ସ୍ମୃତି ଯାହା କେବେ ଭୁଲିଯିବ ନାହିଁ ଏବଂ ୱେଷ୍ଟଇଣ୍ଡିଜ୍ ଲୋକଙ୍କ ପ୍ରତିନିଧିତ୍ୱ କରିବାର ସୁଯୋଗ। ମାରୁନ୍ ପୋଷାକ ପିନ୍ଧିବା, ଜାତୀୟ ସଙ୍ଗୀତ ପାଇଁ ଠିଆ ହେବା ଏବଂ ପ୍ରତିଥର ମୁଁ ପଡ଼ିଆରେ ପାଦ ଦେବା ସମୟରେ ମୋର ୧୦୦ ପ୍ରତିଶତ ଦେବା। ଏହା ମୋ ପାଇଁ କ’ଣ ଅର୍ଥ ରଖେ ତାହା ଶବ୍ଦରେ ବର୍ଣ୍ଣନା କରିବା କଷ୍ଟକର। ଅଧିନାୟକ ଭାବରେ ଦଳକୁ ନେତୃତ୍ୱ ଦେବା ମୋ ପାଇଁ ସର୍ବଦା ସମ୍ମାନର ବିଷୟ ହେବ।"

ପୁରନ୍ ନିଜ ପ୍ରଶଂସକଙ୍କ ପାଇଁ ଲେଖିଛନ୍ତି, "ଆପଣଙ୍କ ଅତୁଟ ପ୍ରେମ ପାଇଁ ଧନ୍ୟବାଦ। ଆପଣମାନେ ମୋତେ କଷ୍ଟକର ସମୟରେ ସମର୍ଥନ କରିଥିଲେ ଏବଂ ଭଲ ମୁହୂର୍ତ୍ତଗୁଡ଼ିକୁ ଉତ୍ସାହର ସହିତ ପାଳନ କରିଥିଲେ।" 

ନିଜ ପରିବାର, ବନ୍ଧୁ ଏବଂ ସାଥୀ ଖେଳାଳିମାନଙ୍କ ପାଇଁ ସେ ଲେଖିଛନ୍ତି, "ଏହି ଯାତ୍ରାରେ ମୋ ସହିତ ଚାଲିବା ପାଇଁ ଧନ୍ୟବାଦ। ଆପଣଙ୍କ ବିଶ୍ୱାସ ଏବଂ ସମର୍ଥନ ମୋତେ ଏହି ଯାତ୍ରାରେ ଆଗକୁ ବଢ଼ାଉଥିଲା। ଯଦିଓ ମୋ କ୍ୟାରିୟରର ଏହି ଅନ୍ତର୍ଜାତୀୟ ଅଧ୍ୟାୟ ବନ୍ଦ ହୋଇଯାଇଛି, ୱେଷ୍ଟଇଣ୍ଡିଜ୍ କ୍ରିକେଟ୍ ପ୍ରତି ମୋର ଭଲପାଇବା କେବେ ହ୍ରାସ ପାଇବ ନାହିଁ। ମୁଁ ଦଳର ସଫଳତା ବ୍ୟତୀତ ଆଉ କିଛି କାମନା କରେ ନାହିଁ।"

ପୁରନ ୨୦୧୬ରେ ନିଜର ଟି-୨୦ ଆନ୍ତର୍ଜାତୀୟ ଡେବ୍ୟୁ କରିଥିଲେ। ୩ ବର୍ଷ ପରେ ୨୦୧୯ରେ ସେ ତାଙ୍କର ଏକଦିବସୀୟ ଡେବ୍ୟୁ କରିଥିଲେ। ସେ ୱେଷ୍ଟଇଣ୍ଡିଜ୍ ପାଇଁ କେବେ ଟେଷ୍ଟ ଖେଳି ନାହାଁନ୍ତି। ତାଙ୍କ ଅନ୍ତର୍ଜାତୀୟ କ୍ୟାରିୟରରେ ପୁରନ ୬୧ଟି ଦିନିକିଆ ଏବଂ ୧୦୬ ଟି-୨୦ ମ୍ୟାଚ୍ ଖେଳିଥିଲେ। ଯେଉଁଥିରେ ସେ ଯଥାକ୍ରମେ ୧୯୮୩ ଏବଂ ୨୨୭୫ ରନ୍ କରିଥିଲେ।

ଏକଦିବସୀୟ କ୍ୟାରିୟରରେ ପୁରନ ୩ଟି ଶତକ ଏବଂ ୧୧ ଅର୍ଦ୍ଧଶତକ ମାରିଛନ୍ତି। ଯେତେବେଳେ କି ଟି-୨୦ ଆନ୍ତର୍ଜାତୀୟରେ ତାଙ୍କ ନାମରେ ୧୩ଟି ଅର୍ଦ୍ଧଶତକ ଅଛି। ୧୯ ଡିସେମ୍ବର ୨୦୨୪ରେ ବାଂଲାଦେଶ ବିପକ୍ଷରେ ଟି-୨୦ ମ୍ୟାଚ୍ ପୁରନଙ୍କ ଶେଷ ଅନ୍ତର୍ଜାତୀୟ ମ୍ୟାଚ୍ ଥିଲା।