Shubman Gill History: ଶତକ ହାସଲ କରି ଇତିହାସ ରଚିଲେ ଗିଲ୍, ଏପରି କରିବାରେ ହେଲେ ପ୍ରଥମ ଭାରତୀୟ ଅଧିନାୟକ

Shubman Gill History: ଭାରତୀୟ ଦଳର ଷ୍ଟାର ବ୍ୟାଟ୍ସମ୍ୟାନ୍ ଶୁବମନ ଗିଲ୍ ଇଂଲଣ୍ଡ ବିପକ୍ଷ ଏଜବାଷ୍ଟନ୍ ଟେଷ୍ଟରେ ଶତକ ହାସଲ କରିଛନ୍ତି। ସେ ପ୍ରଥମ ଇନିଂସରେ ଦ୍ୱିଶତକ ହାସଲ କରିଥିଲେ। ସେ ଗୋଟିଏ ମ୍ୟାଚ୍‌ରେ ଦ୍ୱିଶତକ ଏବଂ ଶତକ ହାସଲ କରିବାରେ ବିଶ୍ୱର ନବମ ବ୍ୟାଟ୍ସମ୍ୟାନ୍ ହୋଇଛନ୍ତି।

Shubman Gill History: ଭାରତର ଅଧିନାୟକ ହେବା ପୂର୍ବରୁ ଶୁବମନ ଗିଲଙ୍କ ଟେଷ୍ଟ କ୍ୟାରିୟର ଉପରେ ପ୍ରଶ୍ନ ଉଠିଥିଲା। ଏସିଆ ବାହାରେ ତାଙ୍କର ରେକର୍ଡ ବହୁତ ସାଧାରଣ ଥିଲା। ସମାଲୋଚକମାନେ ଗିଲଙ୍କ ଚୟନ ସମେତ ତାଙ୍କ ଅଧିନାୟକତ୍ୱ ଦେବା ଉପରେ ପ୍ରଶ୍ନ ଉଠାଇଥିଲେ। ଗିଲ୍ ଇଂଲଣ୍ଡ ଗସ୍ତର ପ୍ରଥମ ୪ ଇନିଂସରେ ଗୋଟିଏ ଦ୍ୱିଶତକ ଏବଂ ୨ ଶତକ ମାରି ସବୁ ପ୍ରଶ୍ନଗୁଡ଼ିକର ପୂର୍ଣ୍ଣଚ୍ଛେଦ ପକାଇଛନ୍ତି। ବର୍ମିଂହାମ ଟେଷ୍ଟର ପ୍ରଥମ ଇନିଂସରେ ଦ୍ୱିଶତକ ହାସଲ କରିବା ପରେ, ଗିଲ୍ ଦ୍ୱିତୀୟ ଇନିଂସରେ ଶତକ ହାସଲ କରି ଇତିହାସ ସୃଷ୍ଟି କରିଛନ୍ତି।

ଶୁବମନ ଗିଲ ପ୍ରଥମ ଭାରତୀୟ ଏବଂ ବିଶ୍ୱର ଦ୍ୱିତୀୟ ଅଧିନାୟକ ଯିଏକି ଟେଷ୍ଟ ମ୍ୟାଚରେ ଦ୍ୱିଶତକ ଓ ଶତକ ହାସଲ କରିଛନ୍ତି। ଗିଲଙ୍କ ବ୍ୟତୀତ କେବଳ ପୂର୍ବତନ ଇଂଲଣ୍ଡ କ୍ରିକେଟର ଗ୍ରାହାମ ଗୁଚ୍ ଏହି ସଫଳତା ହାସଲ କରିପାରିଛନ୍ତି। ଗୁଚ୍ ୧୯୯୦ ମସିହାରେ ଲର୍ଡସରେ ଭାରତ ବିପକ୍ଷରେ ତ୍ରିଶତକ ଏବଂ ଶତକ ହାସଲ କରିଥିଲେ। ଗୁଚ୍ ୩୩୩ ଏବଂ ୧୨୩ ରନର ଇନିଂସ ଖେଳିଥିଲେ। ଗିଲଙ୍କ ପୂର୍ବରୁ ୮ ଜଣ ବ୍ୟାଟସମ୍ୟାନ୍ ଗୋଟିଏ ଟେଷ୍ଟ ମ୍ୟାଚରେ ଶତକ ଏବଂ ଦ୍ୱିଶତକ ହାସଲ କରିଛନ୍ତି। ଲିଟିଲ୍ ମାଷ୍ଟର ସୁନୀଲ ଗାଭାସ୍କର ମଧ୍ୟ ଏଥିରେ ସାମିଲ ଅଛନ୍ତି।

ଶୁବମନ ଗିଲ୍ ଟେଷ୍ଟ ମ୍ୟାଚ୍‌ର ଉଭୟ ଇନିଂସରେ ଶତକ ହାସଲ କରିବାରେ ଭାରତର ତୃତୀୟ ଅଧିନାୟକ ହୋଇଛନ୍ତି। ପୂର୍ବରୁ ସୁନୀଲ ଗାଭାସ୍କର ଏବଂ ବିରାଟ କୋହଲି ଏହି କୃତିତ୍ୱ ହାସଲ କରିଥିଲେ। ଗିଲଙ୍କ ପୂର୍ବରୁ ୭ ଜଣ ଭାରତୀୟ ବ୍ୟାଟ୍ସମ୍ୟାନ୍ ଉଭୟ ଇନିଂସରେ ଶତକ ହାସଲ କରିଛନ୍ତି। ରିଷଭ ପନ୍ତ ଗତ ମ୍ୟାଚ୍‌ରେ ଏହି କୃତିତ୍ୱ ହାସଲ କରିଥିଲେ। ସେ ଇଂଲଣ୍ଡରେ ଉଭୟ ଇନିଂସରେ ଶତକ ହାସଲ କରିଥିବା ପ୍ରଥମ ଭାରତୀୟ ହୋଇଥିଲେ।

ଶୁବମନ ଗିଲ ଗୋଟିଏ ଟେଷ୍ଟ ମ୍ୟାଚ୍‌ରେ ସର୍ବାଧିକ ରନ୍ କରିଥିବା ବ୍ୟାଟ୍ସମ୍ୟାନ୍ ମଧ୍ୟ ହୋଇଛନ୍ତି। ସେ ସୁନୀଲ ଗାଭାସ୍କରଙ୍କ ରେକର୍ଡ ଭାଙ୍ଗିଛନ୍ତି। ସୁନୀଲ ଗାଭାସ୍କର ୧୯୭୧ ମସିହାରେ ୱେଷ୍ଟଇଣ୍ଡିଜ୍ ବିପକ୍ଷରେ ଏକ ଟେଷ୍ଟ ମ୍ୟାଚ୍‌ରେ ୩୪୪ ରନ୍ କରିଥିଲେ। ଶୁଭମନ ଗିଲ୍ ଏହି ଟେଷ୍ଟ ମ୍ୟାଚ୍‌ରେ ଏହି ରନ୍ ପାର କରିଛନ୍ତି। ଭିଭିଏସ୍ ଲକ୍ଷ୍ମଣ ୨୦୧୧ ମସିହାରେ ଅଷ୍ଟ୍ରେଲିଆ ବିପକ୍ଷରେ ଏକ ମ୍ୟାଚ୍‌ରେ ୩୪୦ ରନ୍ କରିଥିଲେ। ସୌରଭ ଗାଙ୍ଗୁଲି ୨୦୦୭ ମସିହାରେ ପାକିସ୍ତାନ ବିପକ୍ଷରେ ଏକ ଟେଷ୍ଟ ମ୍ୟାଚ୍‌ରେ ୩୩୦ ରନ୍ କରିଥିଲେ।