MI Vs PBKS: ମୁମ୍ବାଇର ଟାଇଟଲ ସ୍ୱପ୍ନକୁ ଚୁରମାର କଲା ପଞ୍ଜାବ, ଏଥର ଆଇପିଏଲ ଦେଖିବ ନୂଆ ଚାମ୍ପିଅନ

MI Vs PBKS: ନୂଆଦିଲ୍ଲୀ: ପଞ୍ଜାବ କିଙ୍ଗ୍ସ IPL 2025 ର ଫାଇନାଲରେ ପ୍ରବେଶ କରିଛି।  ଅଧିନାୟକ ଶ୍ରେୟସ ଆୟାରଙ୍କ ଦମଦାର ଇନିଂସ ବଳରେ ପଞ୍ଜାବ ୧୧ ବର୍ଷ ପରେ ଫାଇନାଲରେ ପ୍ରବେଶ କରିଛି। ମୁମ୍ବାଇ ଦ୍ୱାରା ଦିଆଯାଇଥିବା ୨୦୪ ରନର ଟାର୍ଗେଟକୁ ପଞ୍ଜାବ ୫ ୱିକେଟ ହରାଇ ହାସଲ କରିଛି। ଅଧିନାୟକ ଆୟାର ଚମତ୍କାର ବ୍ୟାଟିଂ କରି ୪୧ ବଲରେ ୮୭ ରନର ଅପରାଜିତ ପାଳି ଖେଳିଥିଲେ। ଆୟର ୧୯ତମ ଓଭରରେ ଅଶ୍ୱିନୀ କୁମାରଙ୍କ ବିପକ୍ଷରେ ଚାରୋଟି ଛକା ମାରି ଫାଇନାଲରେ ପଞ୍ଜାବକୁ ପ୍ରବେଶ କରାଇଥିଲେ। ଶ୍ରେୟସଙ୍କ ବ୍ୟତୀତ ନେହାଲ ଭାଡେରା ମଧ୍ୟ ୨୯ ବଲରେ ୪୮ ରନ କରିଥିଲେ। ଜୋଶ ଇଙ୍ଗଲିସ୍ ୨୧ ବଲରେ ୩୮ ରନ କରିଥିଲେ। 

୨୦୪ ରନର ଟାର୍ଗେଟକୁ ପିଛା କରି ପାଳି ଆରମ୍ଭ କରିଥିଲା ପଞ୍ଜାବ। କିନ୍ତୁ ଆରମ୍ଭରୁ ପଞ୍ଜାବର ବ୍ୟାଟିଂ ବିପର୍ଯ୍ୟୟର ସମ୍ମୁଖିନ ହୋଇଥିଲା। ପ୍ରଭସିମରନ୍ ୯ଟି ବଲ ଖେଳି ମାତ୍ର ୬ ରନ କରିପାରିଥିଲେ। ପ୍ରିୟାଂଶ ଆର୍ଯ୍ୟ ଏବଂ ଜୋଶ୍ ଇଙ୍ଗଲିସ୍ ଦ୍ୱିତୀୟ ୱିକେଟ ପାଇଁ ୪୨ ରନ ଯୋଡିଥିଲେ। ପ୍ରିୟାଂଶ ୧୦ଟି ବଲ ଖେଳି ୨୦ ରନ କରିବା ପରେ ଆଉଟ ହୋଇଥିଲେ। ଇଙ୍ଗଲିସ୍ ୨୧ଟି ବଲ ଖେଳି ୩୮ ରନ କରିଥିଲେ। ତାଙ୍କ ଇନିଂସ ସମୟରେ ସେ ୫ଟି ଚୌକା ଏବଂ ୨ଟି ଛକା ମାରିଥିଲେ। ଇଙ୍ଗଲିସ୍ ପ୍ୟାଭିଲିଅନକୁ ଫେରିବା ପରେ ଶ୍ରେୟସ ଆୟର ଏବଂ ନେହାଲ୍ ଭାଡେରା ଦାୟିତ୍ୱ ନେଇଥିଲେ। ଚତୁର୍ଥ ୱିକେଟ ପାଇଁ ଉଭୟ ୪୭ ବଲ ଖେଳି ୮୪ ରନର ପାର୍ଟନରସିପ୍ କରିଥିଲେ। ନେହାଲ୍ ୨୯ ବଲ ଖେଳି ୪୮ ରନର ଏକ ଚମତ୍କାର ଇନିଂସ ଖେଳିଥିଲେ।

ଆୟାର ଖେଳିଥିଲେ ଦମଦାର ପାଳି
ଶ୍ରେୟସ ଆୟର ଗୁରୁତ୍ୱପୂର୍ଣ୍ଣ ମ୍ୟାଚ୍‌ରେ ଅଧିନାୟକତ୍ୱ ଇନିଂସ ଖେଳିଥିଲେ। ଚତୁର୍ଥ ନମ୍ବରରେ ଆସି ଆୟର ନେହାଲଙ୍କ ସହ ୮୪ ରନ୍‌ର ପାର୍ଟନରସିପ୍ କରିଥିଲେ। ନେହାଲ ପ୍ୟାଭିଲିୟନ ଫେରିବା ପରେ ମଧ୍ୟ ଆୟର ଗୋଟିଏ ଏଣ୍ଡକୁ ଧରି ମୁମ୍ବାଇର ବୋଲିଂ ଆକ୍ରମଣରେ ବିପର୍ଯ୍ୟୟ ସୃଷ୍ଟି କରିଥିଲେ। ପଞ୍ଜାବ ଅଧିନାୟକ ୪୧ ବଲ୍‌ ସାମ୍ନା କରି ୮୭ ରନ୍‌ର ଏକ ଦମଦାର ଇନିଂସ ଖେଳିଥିଲେ। ଆୟର ଅଶ୍ୱିନୀ କୁମାରଙ୍କ ଓଭରରେ ୪ଟି ଛକା ମାରି ୧୧ ବର୍ଷ ପରେ ପଞ୍ଜାବକୁ ଫାଇନାଲ୍ ଟିକେଟ୍ ଦେଇଥିଲେ। ଏବେ ଜୁନ୍ ୩ ତାରିଖରେ ଟାଇଟଲ୍ ମ୍ୟାଚ୍‌ରେ ପଞ୍ଜାବ ଆରସିବି ସହିତ ମୁକାବିଲା କରିବ।

Make way for the 

They are all locked in to meet #RCB for the   #TATAIPL | #PBKSvMI | #Qualifier2 | #TheLastMile

— IndianPremierLeague (@IPL) June 1, 2025

ପୂର୍ବରୁ ଟସ୍ ହାରି ପ୍ରଥମେ ବ୍ୟାଟିଂ କରିବା ପରେ ମୁମ୍ବାଇର ଆରମ୍ଭ ଭଲ ନଥିଲା। ରୋହିତ ଶର୍ମା ମାତ୍ର ୮ ରନ କରି ମାର୍କସ୍ ଷ୍ଟୋଇନିସଙ୍କ ଦ୍ୱାରା ଆଉଟ ହୋଇଥିଲେ। ତଥାପି, ଏହା ପରେ ଜନି ବେୟାରଷ୍ଟୋ ଏବଂ ତିଲକ ବର୍ମା ଦ୍ୱିତୀୟ ୱିକେଟ ପାଇଁ ଅର୍ଦ୍ଧଶତକୀୟ ଭାଗୀଦାରି କରିଥିଲେ। ବେୟାରଷ୍ଟୋ ୨୪ ବଲରେ ୩୮ ରନ କରିଥିଲେ। ସେହିପରି ତିଲକ ୨୯ ବଲରେ ୪୪ ରନ କରିଥିଲେ। ତିଲକ ତାଙ୍କ ଇନିଂସ ସମୟରେ ୨ ଚୌକା ଏବଂ ୨ ଛକା ମାରିଥିଲେ।

ବେୟାରଷ୍ଟୋ ପ୍ୟାଭିଲିୟନ ଫେରିବା ପରେ ଚତୁର୍ଥ ନମ୍ବରରେ ବ୍ୟାଟିଂ କରିବାକୁ ଆସିଥିବା ସୂର୍ଯ୍ୟକୁମାର ଯାଦବ ବ୍ୟାଟ୍ ସହିତ ବହୁତ ଭଲ ପ୍ରଦର୍ଶନ କରିଥିଲେ। ସୂର୍ଯ୍ୟ ୨୬ ବଲ୍‌ରେ ୪ ଚୌକା ଏବଂ ୩ ଛକା ସହାୟତାରେ ୪୪ ରନ୍ କରିଥିଲେ। ସୂର୍ଯ୍ୟ ତିଲକଙ୍କ ସହିତ ମିଶି ତୃତୀୟ ୱିକେଟ୍ ପାଇଁ ୭୨ ରନ୍ ର ପାର୍ଟନରସିପ୍ କରିଥିଲେ। ଶେଷ ଓଭରଗୁଡ଼ିକରେ ନମନ ଧୀର ଝଡ଼ବାନ୍ ବ୍ୟାଟିଂ କରିଥିଲେ ଏବଂ ମାତ୍ର ୧୮ ବଲ୍‌ରେ ୩୭ ରନ୍ କରିଥିଲେ। ନମନ ତାଙ୍କ ଇନିଂସରେ ୭ ଚୌକା ମାରିଥିଲେ। ହାର୍ଦ୍ଦିକ ପାଣ୍ଡ୍ୟା ୧୩ ବଲ୍‌ରେ ୧୫ ରନ୍ କରିଥିଲେ, ଯାହା ଫଳରେ ମୁମ୍ବାଇ ୬ ୱିକେଟ୍ ହରାଇ ସ୍କୋର ବୋର୍ଡରେ ୨୦୩ ରନ୍ ରଖିବାରେ ସଫଳ ହୋଇଥିଲା।