સ્ક્રીન ટાઈમને કારણે બાળકોમાં વધી રહ્યા છે ચશ્મા, આરોગ્ય વિભાગની તપાસમાં સામે આવી ચોંકાવનારી વિગત

અમદાવાદઃ જો તમારા ઘરે પણ બાળક છે તો આ સમાચાર તમારા માટે ખુબ જ અગત્યના છે. આજે મોબાઈલનો ઉપયોગ અનેક ગણો વધી ગયો છે, ખાસ બાળકો મોબાઈલનો ઉપયોગ વધારે કરે છે, રમત-ગમતની જગ્યાએ તેઓ સ્ક્રીન પર જ સમય વધારે પસાર કરે છે. મોબાઈલમાં આવતી જાતભાતની ઓનલાઈન ગેમ્સ, સોશિયલ મીડિયામાં આવતી રીલો અને જાતભાતના વીડિયો જોવામાં સમય વધારે પસાર કરે છે. એટલે કે જે બાળકોએ ફ્રી સમય મેદાનમાં વિતાવો જોઈએ તેની જગ્યા હવે મોબાઈલે લઈ લીધી છે. 

ટેક્નોલોજી અને આધુનિક સમયમાં આવેલા આ બદલાવથી મોટું નુકસાન બાળકોને થઈ રહ્યું છે. મહેસાણા જિલ્લામાં સરકારી શાળાઓમાં બાળકોના ચશ્મા વધી ગયા છે. હા, શાળાઓમાં જ્યારે આરોગ્ય વિભાગે આંખોની તપાસ કરી તો બાળકોમાં નંબર આવ્યાનું પ્રમાણ ગત વર્ષની સરખામણીએ અનેક ગણુ વધેલું જોવા મળ્યું. 

આ પણ વાંચોઃ રાજ્યના ધારાસભ્યોને પણ નડી મોંઘવારી! વિધાનસભામાં કરી પગાર અને ભથ્થામાં વધારાની માગણી

આરોગ્ય વિભાગની તપાસમાં આ વર્ષે 4 હજાર 819 બાળકોમાં એકથી 4 નંબર જોવા મળ્યા, ગત વર્ષે આ સંખ્યા 4 હજાર 156 હતી, એટલે કે ગત વર્ષની સરખાણીએ આ વખતે વધુ 663 બાળકોમાં નંબર જોવા મળ્યા. એટલું જ નહીં તપાસમાં એવું પણ સામે આવ્યું કે બાળકોમાં માયોપીય નામની બીમારીમાં વધારો પણ જોવા મળ્યો. માયોપીયા એ બીમારી છે જેનાથી નજીકનું સ્પષ્ટ અને દૂરની વસ્તુ ધૂંધળી દેખાય છે. આ બીમારી વધવાનું કારણ સ્ક્રીન છે. સ્ક્રીન પર વધારે સમય આપવાને કારણે આ બીમારી વધી છે. 

શું આવ્યું સામે? 
4,819 બાળકોમાં 1થી 4 નંબર જોવા મળ્યા
ગત વર્ષે બાળકોની સંખ્યા 4,156 હતી,
ગત વર્ષની સરખાણીએ 663 બાળકોમાં નંબર વધ્યા
બાળકોમાં માયોપીય નામની બીમારીમાં વધારો જોવા મળ્યો
માયોપીયાથી નજીકની સ્પષ્ટ, દૂરની વસ્તુ ધૂંધળી દેખાય છે.