રિષભ પંતની દિવાની છે આ ઓસ્ટ્રેલિયન ક્રિકેટરની દીકરી, હાલમાં DPLમાં મચાવી રહી છે ધૂમ

ભારતીય ટીમનો વિસ્ફોટક બેટ્સમેન રિષભ પંત તેની શાનદાર બેટિંગ માટે જાણીતો છે. લોકો તેની બેટિંગના દિવાના છે. રિષભ પંતે ભારતીય ટીમ માટે બધા ફોર્મેટમાં શાનદાર બેટિંગ કરી છે. ખાસ કરીને ટેસ્ટ ક્રિકેટમાં જ્યાં લોકો કાળજીપૂર્વક અને ધીમા રમતા હોય છે, પંત ટેસ્ટમાં પણ T20 સ્ટાઈલમાં બેટિંગ કરવા માટે જાણીતો છે. હાલમાં ભૂતપૂર્વ ઓસ્ટ્રેલિયન ખેલાડી મેથ્યુ હેડનની પુત્રીનું એક નિવેદન વાયરલ થઈ રહ્યું છે, જેમાં તેણે કહ્યું છે કે તે રિષભને ખૂબ પસંદ કરે છે.

ગ્રેસ હેડને કરી પોતાના દિલની વાત 

ઓસ્ટ્રેલિયન ક્રિકેટર મેથ્યુ હેડનની પુત્રી ગ્રેસ હેડનને પૂછવામાં આવ્યું કે તમને કેએલ રાહુલ ગમે છે કે રિષભ પંત ? ગ્રેસ હેડને આનો જવાબ આપતા કહ્યું, 'રિષભનું મારા દિલમાં ખાસ સ્થાન છે, ઇંગ્લેન્ડ સામેની ટેસ્ટ શ્રેણીમાં ઇજાગ્રસ્ત હોવા છતાં તે જે રીતે બેટિંગ કરવા આવ્યો તે પ્રશંસનીય હતું. આ એક મોટી વાત છે, પગમાં ઇજા થયા પછી પણ રમવું સરળ નથી. મને તે ખૂબ ગમ્યું.'

રિષભ ઈંગ્લેન્ડ સામે ચોથી ટેસ્ટમાં બેટિંગ કરી રહ્યો હતો. તે દરમિયાન ક્રિસ વોક્સનો બોલ તેના પગમાં વાગ્યો, જેના પછી તેને મેદાન છોડવું પડ્યું. ચોથી ટેસ્ટની પહેલી ઇનિંગમાં રિષભ ઘાયલ થયો હતો. તપાસ બાદ જાણવા મળ્યું કે રિષભની ઇજા ઘણી ઊંડી છે અને તેના માટે આગળ બેટિંગ કરવી સરળ રહેશે નહીં. તેમ છતાં રિષભ બેટિંગ કરવા આવ્યો અને તેણે શાનદાર અડધી સદી ફટકારી. રિષભે ઇંગ્લેન્ડ સામેની આ શ્રેણીમાં શાનદાર પ્રદર્શન કર્યું. રિષભે આ શ્રેણીમાં 68.43ની સરેરાશથી 469 રન બનાવ્યા.

હેડન DPLમાં ધમાલ મચાવી રહી છે

ગ્રેસ હેડન દિલ્હી પ્રીમિયર લીગ DPL 2025નું સંચાલન કરી રહી છે. અત્યાર સુધી તેણીએ પોતાનું કામ સારી રીતે કર્યું છે. અગાઉ ગ્રેસે 2025માં સ્ટાર સ્પોર્ટ્સ વતી IPLનું કવરેજ શાનદાર રીતે કર્યું હતું. DPL 2 ઓગસ્ટ 2025થી શરૂ થઈ છે.