સંજુ સેમસને ઓક્શનમાં તોડ્યા બધા રેકોર્ડ, સૌથી મોંઘા ખેલાડી કરતા મેળવ્યા ચાર ગણા વધુ પૈસા

Sanju Samson : ભારતના લગભગ તમામ રાજ્ય સંગઠનો પોતાની લીગનું આયોજન કરી રહ્યા છે. કેરળ ક્રિકેટ લીગનું પણ કેરળમાં આયોજન કરવામાં આવે છે. લીગની પહેલી સીઝન 2024માં યોજાઈ હતી. આ વખતે બીજી સીઝનનું આયોજન થવા જઈ રહ્યું છે. આ પહેલા ખેલાડીઓની હરાજી થઈ રહી છે. કેરળના બેટ્સમેન અને રાજસ્થાન રોયલ્સનો કેપ્ટન સંજુ સેમસન કેરળ ક્રિકેટ લીગ (KCL)માં સૌથી મોંઘો ખેલાડી બન્યો છે.

સંજુ સેમસન ગઈ સીઝનમાં રમ્યો નહોતો

કોચી બ્લુ ટાઈગર્સે કેરળ ક્રિકેટ લીગની હરાજીમાં સંજુ સેમસનને ખરીદવા માટે 26.8 લાખ રૂપિયા ખર્ચ કર્યા હતા. આ સાથે, સંજુ લીગ ઇતિહાસનો સૌથી મોંઘો ખેલાડી બની ગયો છે. સંજુ સેમસનએ પાછલો રેકોર્ડ મોટા માર્જિનથી તોડી નાખ્યો. અગાઉનો રેકોર્ડ 7.4 લાખ રૂપિયાનો હતો, જે ત્રિવેન્દ્રમ રોયલ્સે એમએસ અખિલ માટે ચૂકવ્યો હતો. 30 વર્ષીય સેમસન ગયા વર્ષે ટુર્નામેન્ટની પહેલી સિઝનમાં રમી શક્યો નહોતો. 

ઈજાને કારણે IPLમાં ફક્ત નવ મેચ જ રમનાર સેમસન હવે KCLમાં જરૂરી મેચ પ્રેક્ટિસ મેળવવાની આશા રાખશે. આ સીઝનમાં તેણે IPLમાં 140.39ના સ્ટ્રાઈક રેટથી 285 રન બનાવ્યા, જેમાં ફક્ત એક અડધી સદીનો સમાવેશ થાય છે. 

સીઝન 22 ઓગસ્ટથી શરૂ થાય છે

કેરળ ક્રિકેટ લીગની બીજી સીઝન 22 ઓગસ્ટથી શરૂ થશે. ટાઇટલ મેચ 7 સપ્ટેમ્બરના રોજ રમાશે. T20 લીગમાં ભાગ લેનારી છ ફ્રેન્ચાઇઝીઓમાં કોલ્લમ સેઇલર્સ, કાલિકટ ગ્લોબસ્ટાર્સ, એલેપ્પી રિપલ્સ, કોચી બ્લુ ટાઇગર્સ, થ્રિસુર ટાઇટન્સ અને ત્રિવેન્દ્રમ રોયલ્સનો સમાવેશ થાય છે. શરૂઆતની સીઝનમાં 114 ખેલાડીઓ હતા, જેમને હરાજીમાં ભાગ લેનારા 168 ખેલાડીઓમાંથી પસંદ કરવામાં આવ્યા હતા. દરેક ફ્રેન્ચાઇઝીએ હરાજીમાં સરેરાશ 40 લાખ રૂપિયા ખર્ચ્યા હતા. કેરળના કેપ્ટન સચિન બેબીના નેતૃત્વમાં સેઇલર્સે ગ્લોબસ્ટાર્સને હરાવીને શરૂઆતનો ખિતાબ જીત્યો હતો.