તબાહી દૂર નથી ! રશિયાએ 38 વર્ષ જૂની પરમાણુ સંધિ તોડી, હવે પુતિનને મળી છૂટ

Russia-US Tension : યુક્રેન સામેના યુદ્ધનો અંત લાવવા માટે અમેરિકા રશિયા પર સતત દબાણ કરી રહ્યું છે. રશિયા પર દબાણ લાવવા માટે અમેરિકાએ તેને ટેકો આપતા દેશો સામે આર્થિક પ્રતિબંધો અને ટેરિફ વોરથી લઈને પરમાણુ શસ્ત્રો સુધીની બધી યુક્તિઓનો ઉપયોગ કર્યો છે. આ દરમિયાન, રશિયાએ એક મોટી જાહેરાત કરી છે અને 1987માં અમેરિકા સાથે થયેલી 38 વર્ષ જૂની પરમાણુ સંધિ ઇન્ટરમીડિયેટ-રેન્જ ન્યુક્લિયર ફોર્સિસ (INF) સંધિમાંથી હટી ગયું છે. બંને દેશો વચ્ચેની આ સંધિ ટૂંકી અને મધ્યમ અંતરની મિસાઇલો તૈનાત ન કરવા અંગે હતી. ભૂતપૂર્વ રશિયન રાષ્ટ્રપતિ દિમિત્રી એનાટોલીયેવિચ મેદવેદેવે નાટોની રશિયા વિરોધી નીતિઓ પર અમેરિકાને કટાક્ષ કર્યો છે.

રશિયાએ પરમાણુ મિસાઇલો તૈનાત કરવા પર પ્રતિબંધ મૂકતી સંધિમાંથી પોતાને બહાર કરી લીધું છે અને તેની સુરક્ષા માટે સીધો ખતરો ઉભો કરવા માટે લેવામાં આવેલા પગલાં માટે પશ્ચિમી દેશોને દોષી ઠેરવ્યા છે. રશિયાએ આ પગલું ત્યારે ભર્યું છે જ્યારે યુએસ રાષ્ટ્રપતિ ડોનાલ્ડ ટ્રમ્પે રશિયા નજીક બે પરમાણુ સબમરીન તૈનાત કરી છે. અમેરિકાના આ પગલા પછી રશિયન વિદેશ મંત્રાલયે એક નિવેદન બહાર પાડીને કહ્યું છે કે સોવિયેત યુગ દરમિયાન કરવામાં આવેલી આ સંધિનું પાલન કરવાની શરતો હવે અસ્તિત્વમાં નથી. આવી સ્થિતિમાં, મોસ્કો પણ હવે તેના પર લાદવામાં આવેલા સંધિ પ્રતિબંધોનું પાલન કરશે નહીં.

રશિયાએ 38 વર્ષ જૂની સંધિ તોડી, પશ્ચિમી દેશોને ચેતવણી આપી

રશિયાએ આ પરમાણુ સંધિના ઔપચારિક કરારમાંથી પોતાને બાકાત રાખતા જાહેરાત કરી હતી કે તે હવે તેના પર લાદવામાં આવેલા પ્રતિબંધોથી બંધાયેલું નથી. ભૂતપૂર્વ રશિયન રાષ્ટ્રપતિ મેદવેદેવે આ માટે નાટોની રશિયા વિરોધી નીતિઓને દોષી ઠેરવી હતી. અગાઉ, 2 ઓગસ્ટ, 2019ના રોજ, અમેરિકાએ રશિયા પર તેનું ઉલ્લંઘન કરવાનો આરોપ લગાવીને આ સંધિમાંથી ખસી ગયું હતું. જ્યારે, રશિયાએ પોતાના પર લાદવામાં આવેલા પ્રતિબંધો ચાલુ રાખ્યા હતા. ભૂતપૂર્વ રશિયન રાષ્ટ્રપતિએ સોશિયલ મીડિયા પ્લેટફોર્મ X પર લખ્યું હતું કે, 'આ એક નવી વાસ્તવિકતા છે, જેનો સામનો આપણા બધા વિરોધીઓએ કરવો પડશે. ભવિષ્યમાં નિર્ણયો લેવાનો ઈંતજાર કરો.'

INF પરમાણુ સંધિ શું છે ?

38 વર્ષ પહેલાં 1987માં રશિયા અને અમેરિકા વચ્ચે INF પરમાણુ સંધિ પર હસ્તાક્ષર થયા હતા. તે સમયે, તત્કાલિન સોવિયેત રશિયન નેતા મિખાઇલ ગોર્બાચેવ અને તત્કાલિન યુએસ રાષ્ટ્રપતિ રોનાલ્ડ રીગનએ આ સંધિ પર હસ્તાક્ષર કર્યા હતા. અમેરિકા અને રશિયા 500થી 5500KM ની રેન્જવાળા મિસાઇલ લોન્ચર, જમીનથી છોડવામાં આવતી બેલિસ્ટિક મિસાઇલો અને ક્રુઝ મિસાઇલો તૈનાત કરશે નહીં. પરંતુ, અમેરિકાએ 2019માં આ કરારમાંથી પીછેહઠ કરી હતી.