લો બોલો ! 50 ઓવરની મેચ 5 બોલમાં ખતમ...49 ઓવર બાકી રહેતા જીતી ગઈ ટીમ, 500ના સ્ટ્રાઈક રેટથી બેટિંગ

Unique Cricket Records : ક્રિકેટમાં ઘણીવાર એકતરફી મેચ જોવા મળે છે, પરંતુ કેટલીક મેચો એવી હોય છે કે તેના પર વિશ્વાસ કરવો મુશ્કેલ હોય છે. આવી જ એક મેચ કેનેડા અને આર્જેન્ટિના વચ્ચે ICC મેન્સ અંડર-19 ક્રિકેટ વર્લ્ડ કપ અમેરિકા ક્વોલિફાયર 2025માં રમાઈ હતી, જેમાં કેનેડિયન ટીમે માત્ર 5 બોલમાં ટાર્ગેટ ચેઝ કરીને આર્જેન્ટિનાને 10 વિકેટથી હરાવ્યું હતું. આ મેચ અંડર-19 ક્રિકેટ વર્લ્ડ કપ અમેરિકા ક્વોલિફાયરની ચોથી મેચ હતી.

આર્જેન્ટિના 19.4 ઓવરમાં ઓલ આઉટ

પરમવીર સ્પોર્ટ્સ કોમ્પ્લેક્સ ગ્રાઉન્ડ 2 ખાતે આર્જેન્ટિનાએ ટોસ જીતીને પ્રથમ બેટિંગ કરી, પરંતુ તેના બધા બેટ્સમેન 19.4 ઓવરમાં 23 રનમાં જ ઓલઆઉટ થયા હતા. આર્જેન્ટિનાની ઇનિંગ્સ શરૂઆતથી જ બહાર આવી શકી નહીં અને કોઈ પણ બેટ્સમેન બે આંકડાના સ્કોરને પણ સ્પર્શી શક્યો નહીં. એટલું જ નહીં, 7 ખેલાડીઓ એક પણ રન બનાવ્યા વિના આઉટ થયા. 7 એકસ્ટ્રા રન આવ્યા. કેનેડિયન ફાસ્ટ બોલર જગમનદીપ પોલે શાનદાર બોલિંગ કરી અને 5 ઓવરમાં માત્ર 7 રન આપીને 6 વિકેટ લીધી, જેમાં ત્રણ મેડન ઓવરનો સમાવેશ થાય છે. નવા બોલ સાથેની તેની આક્રમક બોલિંગથી આર્જેન્ટિનાને ઠોકર લાગી અને બાકીના બોલરોની મદદથી 20 ઓવરમાં જ તેમની ઇનિંગ્સનો અંત આવ્યો.

આ બેટ્સમેનની તોફાની બેટિંગ

24 રનના ટાર્ગેટનો પીછો કરતા કેનેડાએ મેચ જીતવામાં સમય લીધો નહીં. ઓપનર બેટ્સમેન અને કેપ્ટન યુવરાજ સમરાએ એક પણ વિકેટ ગુમાવ્યા વિના ટીમને 10 વિકેટથી વિજય અપાવ્યો. ટાર્ગેટ ફક્ત 5 બોલમાં ચેઝ કરવામાં આવ્યો. ધરમ પટેલે ઇનિંગ્સના પહેલા બોલ પર એક રન લીધો, ત્યારબાદ યુવરાજ સમરાએ ફ્રાન્ઝ બૂરના આગામી ચાર બોલ પર ઝડપી બે ચોગ્ગા અને બે છગ્ગા ફટકાર્યા. આ ઓવરમાં બરે ત્રણ વાઈડ પણ આપ્યા, જેના કારણે કેનેડાએ 49.1 ઓવર બાકી રહેતા ટાર્ગેટ હાંસલ કર્યું. યુવરાજ ચાર બોલમાં 20 રન બનાવીને અણનમ રહ્યો, તેણે 500ના સ્ટ્રાઈક રેટથી બેટિંગ કરી.

કેનેડા મજબૂત સ્થિતિમાં

આ જીત સાથે એટલાન્ટામાં યોજાયેલા આ અમેરિકા ક્વોલિફાયરમાં કેનેડા મજબૂત સ્થિતિમાં છે. ટુર્નામેન્ટમાં આર્જેન્ટિના, બર્મુડા, કેનેડા અને યજમાન અમેરિકાનો સમાવેશ થાય છે, જ્યાં દરેક ટીમ ડબલ રાઉન્ડ-રોબિન ફોર્મેટમાં એકબીજા સાથે બે વાર રમશે. ટોચની ટીમ 2026 ICC મેન્સ અંડર-19 ક્રિકેટ વર્લ્ડ કપમાં અમેરિકા ક્ષેત્રમાં એકમાત્ર સ્થાન મેળવશે. ICC મેન્સ અંડર-19 ક્રિકેટ વર્લ્ડ કપ 2026 જાન્યુઆરી અને ફેબ્રુઆરી વચ્ચે નામિબિયા અને ઝિમ્બાબ્વેમાં રમાશે, જેમાં 16 ટીમો 5 સ્થાનો પર મેચ રમશે. ટીમોને પ્રારંભિક તબક્કા માટે 4 જૂથોમાં વહેંચવામાં આવશે. ત્યારબાદ સુપર સિક્સ, સેમિ-ફાઇનલ અને ફાઇનલ રમાશે.