ବର୍ଷେ ତଳେ ଜଏନ କରିଥିଲେ ଏବେ ଲାଞ୍ଚ ନେଇ ଧରା ପଡିଲେ ରାଜସ୍ୱ କର୍ମଚାରୀ

ଗତ ବର୍ଷ (ମାର୍ଚ୍ଚ 2024)ରେ ନିଯୁକ୍ତି ପାଇଥିବା ରାଜସ୍ୱ କର୍ମଚାରୀ, ପ୍ରମାଣପତ୍ର ମାମଲାରେ ଫାଇଲ କାମ ପାଇଁ 30,000 ଟଙ୍କା ଲାଞ୍ଚ ନେଉଥିବା ସମୟରେ ଓଡିଶା ଭିଜିଲାନ୍ସ ଦ୍ୱାରା ଗିରଫ ହୋଇଛନ୍ତି।

ଭୁବନେଶ୍ୱର: ଲାଞ୍ଚ ନେଇ ପୁଣି ଧରା ପଡିଲେ ସରକାରୀ ବାବୁ । ଜୁନିଅର ରାଜସ୍ୱ ସହାୟକ (JRA) ସୌରଭ ତ୍ରିପାଠୀ, ସ୍ୱତନ୍ତ୍ର ପ୍ରମାଣପତ୍ର ବିଭାଗ, ଭୁବନେଶ୍ୱରର ସବ-କଲେକ୍ଟର କାର୍ଯ୍ୟାଳୟରେ ଭିଜିଲାନ୍ସ ହାତରେ ଧରା ପଡିଛନ୍ତି । ଦୀର୍ଘ ଦିନ ଧରି ବିଚାରାଧୀନ ଏକ ପ୍ରମାଣପତ୍ର ମାମଲାରେ ଫାଇଲ କାମ ପାଇଁ ଜଣେ ଅଭିଯୋଗକାରୀଙ୍କଠାରୁ 30,000 ଟଙ୍କା ଲାଞ୍ଚ ମାଗିବା ଏବଂ ଗ୍ରହଣ କରିବା ସମୟରେ ଓଡ଼ିଶା ଭିଜିଲାନ୍ସ ଦ୍ୱାରା ଗିରଫ ହୋଇଛନ୍ତି।

ସୂଚନା ମୁତାବକ, ଅଭିଯୋଗକାରୀଙ୍କ ଦ୍ୱାରା ଅନେକ ଅନୁରୋଧ ସତ୍ତ୍ୱେ, ଶ୍ରୀ ତ୍ରିପାଠୀ ଫାଇଲ ଆରମ୍ଭ କରିବା ପାଇଁ 30,000 ଟଙ୍କା ଲାଞ୍ଚ ମାଗୁଥିଲେ। ଅନ୍ୟ କୌଣସି ଉପାୟ ନପାଇ, ଅଭିଯୋଗକାରୀ ଭିଜିଲାନ୍ସ କର୍ତ୍ତୃପକ୍ଷଙ୍କୁ ମାମଲା ସମ୍ପର୍କରେ ଜଣାଇଥିଲେ । ଏହା ପରେ, ଏକ ଭିଜିଲାନ୍ସ ଟିମ୍ ଆଜି ଶ୍ରୀ ତ୍ରିପାଠୀଙ୍କୁ ଅଭିଯୋଗକାରୀଙ୍କଠାରୁ 30,000 ଟଙ୍କା ଲାଞ୍ଚ ନେଉଥିବା ସମୟରେ ଗିରଫ କରିଛି। ଅଭିଯୁକ୍ତ ଶ୍ରୀ ତ୍ରିପାଠୀଙ୍କ ନିକଟରୁ ଲାଞ୍ଚ ଟଙ୍କା ଜବତ କରାଯାଇଛି। ଭିଜିଲାନ୍ସ ରେଡ୍ ପରେ DA ଦୃଷ୍ଟିରୁ ଶ୍ରୀ ତ୍ରିପାଠୀ, JRA ର ଦୁଇଟି ସ୍ଥାନରେ ଏକକାଳୀନ ତଲାସ ଚାଲିଛି।

ଏହି ସମ୍ପର୍କରେ, ଭୁବନେଶ୍ୱର ଭିଜିଲାନ୍ସ ପି.ଏସ୍. ମାମଲା ନଂ. 17 ତାରିଖ 24.07.2025 ଧାରା 7 ପିସି (ସଂଶୋଧନ) ଆଇନ, 2018 ଅନୁଯାୟୀ ପଞ୍ଜୀକୃତ ହୋଇଛି। ଅଭିଯୁକ୍ତ ଶ୍ରୀ ତ୍ରିପାଠି, JRA ବିରୁଦ୍ଧରେ ତଦନ୍ତ ଜାରି ରହିଛି।