આજે ગાંધીનગરમાં પીએમ મોદીનો ભવ્ય રોડ શો, લોકોએ વ્હાલા પ્રધાનમંત્રી પર ફુલોથી વરસાવ્યું હેત

PM Modi In Gujarat : ઓપરેશન સિંદૂર બાદ પ્રધાનમંત્રી નરેન્દ્ર મોદીનો રાજ્યના પાટનગરમાં પ્રથમ રોડ શો યોજાયો હતો. વહેલી સવારથી જ મોટી સંખ્યામાં પ્રધાનમંત્રીની ઝલક મેળવવા અને અભિવાદન કરવા નગરજનો ઉમટી પડ્યા હતા. રાજ્યના પાટનગરમાં આ પ્રથમ રોડ શોને કારણે અનોખો ઉત્સાહ જોવા મળ્યો હતો.

પ્રધાનમંત્રી નરેન્દ્ર મોદીના ગુજરાત પ્રવાસનો આજે બીજો દિવસ છે. સવારે 10:30 વાગ્યે રાજભવનથી મહાત્મા મંદિર સુધી રોડ-શો કર્યો હતો. સવારે 11 વાગ્યે મહાત્મા મંદિર અર્બન ડેવલોપમેન્ટ પ્રોગ્રામમાં હાજરી આપી હતી. જેમાં ગાંધીનગરના મહાત્મા મંદિર ખાતે પ્રધાનમંત્રી ₹5,536 કરોડના પ્રોજેક્ટ્સનું લોકાર્પણ - ખાતમુહૂર્ત કર્યું. તેના બાદ શહેરી વિકાસ વિભાગ હેઠળ કુલ ₹1,447 કરોડના વિવિધ પ્રોજેક્ટ્સનું લોકાર્પણ કર્યું, જેમાં જામનગર, સુરત, અમદાવાદ, ગાંધીનગર અને જૂનાગઢ શહેરના વિકાસ કાર્યોનો સમાવેશ થાય છે. 

અમદાવાદ ખાતે ₹1000 કરોડના ખર્ચે બનનારા સાબરમતી રિવરફ્રન્ટ ફેઝ-3ના ખાતમુહૂર્તનો સમાવેશ થાય છે. વડાપ્રધાન પ્રધાનમંત્રી આવાસ યોજના હેઠળ ₹1006 કરોડના ખર્ચે તૈયાર થયેલા 22,000થી વધુ રહેણાંક એકમોનું લોકાર્પણ કરશે. 

આજથી સાબરમતી-સોમનાથ વચ્ચે વંદે ભારત દોડશે
ગઈકાલે પ્રધાનમંત્રી મોદીએ લીલી ઝંડી આપ્યા બાદ આજથી સાબરમતી-સોમનાથ વચ્ચે નિયમિત રીતેવંદે ભારત ટ્રેન દોડશે. ગુરુવાર સિવાય સપ્તાહમાં છ દિવસ વંદે ભારત દોડશે. અમદાવાદથી વેરાવળ સાત કલાકમાં ટ્રેન પહોંચાડશે. અમદાવાદથી વેરાવળ ચેરકારનું ભાડું 1105 રૂપિયા છે. તો અમદાવાદથી વેરાવળ એક્ઝિક્યુટિવ ચેરકારનું ભાડું 2110 રૂપિયા છે. આ ટ્રેન સાબરમતીથી સવારે 5.25 વાગ્યે ઉપડશે અને બપોરે 12.25 કલાકે વેરાવળ પહોંચાડશે. ચાંદલોડિયા, વિરમગામ, સુરેન્દ્રનગર, વાંકાનેર, રાજકોટ, જૂનાગઢ ટ્રેન ઉભી રહેશે.