આખી રાત એમ્બ્યુલન્સના સાયરન ગુંજયા, સ્ટ્રેચર ખૂટયા! વડોદરા MSUની ગર્લ્સ હોસ્ટેલમાં રાત્રે મોટી દુર્ઘટના

વડોદરાની વિશ્વવિખ્યાત મહારાજ સયાજીરાવ યુનિ. ની ગર્લ્સ હોસ્ટેલમાં 350 વિધાર્થીનીઓએ રાત્રી ભોજન લીધું હતું. વિદ્યાર્થિનીઓને સારવાર માટે ગોત્રી અને સયાજી હોસ્પિટલમાં ખસેડાઈ હતી. ભોજન લીધા બાદ વિદ્યાર્થિનીઓને રાત્રે ઝાડા ઉલટી અને પેટમાં દુખાવો થયો હતો. 

સયાજી હોસ્પિટલમાં વાઈસ ચાન્સેલર, હોસ્ટેલના ચીફ વોર્ડન, પોલીસના ઉચ્ચ અધિકારીઓ દોડી આવ્યા હતા. મેસના વાસી ભોજનના કારણે વિધાર્થીનીઓનો જીવ જોખમમાં મૂકાયો હતો. અનેક વખત વિધાર્થીનીઓએ ભોજનની ગુણવત્તાને લઈ ફરિયાદ કરી છે.  

આ વિશે મળતી માહિતી પ્રમાણે વડોદરાની મહારાજ સયાજીરાવ યુનિ. માં વિવિધ ફેકલ્ટીમાં અભ્યાસ કરતી વિદ્યાર્થીનીઓ યુનિવર્સિટી હોસ્ટેલમાં રહીં અભ્યાસ કરી રહી છે. જ્યાં હોસ્ટેલમાં જમવા માટે મેસની સુવિધા પણ ઉપલબ્ધ છે. ત્યારે ગતરોજ યુનિવર્સિટીની ત્રણથી ચાર હોસ્ટેલમાં રહેતી વિદ્યાર્થીનીઓએ રાત્રી ભોજન લીધા બાદ તેમની તબિયત અચાનક બગડી હતી.

વિદ્યાર્થીનીઓને એકા એક વોમિટિંગ અને તબિયત નાદુરસ્ત બનતા હોસ્ટેલના વોર્ડનને જાણ કરાઈ હતી. જોકે જોત જોતામાં વિદ્યાર્થનીઓની તબિયત બગડી હોવાની સંખ્યામાં વધારો થતાં તાત્કાલિક યુનિ. ના સત્તાધીશોને જાણ કરી એમ્બ્યુલન્સ બોલાવી વિદ્યાર્થીનીઓને સારવાર માટે સયાજી હોસ્પિટલ તો કેટલાકને ગોત્રી અને ખાનગી હોસ્પિટલમાં ખસેડવામાં આવ્યા હોવાની પ્રાથમિક જાણકારી મળી રહી છે. આમ આખી રાત ગર્લ્સ હોસ્ટેલ કેમ્પસ એમ્બ્યુલન્સના સાયરનથી ગુંજી ઉઠ્યું હતું.

ઘટનાની ગંભીરતાને જોતા સ્થાનિક પોલીસને પણ જાણ કરી તેમની મદદ લેવામાં આવી હતી. હાલ સયાજી હોસ્પિટલ, ગોત્રી અને ખાનગી હોસ્પિટલમાં વિદ્યાર્થીનીઓ સારવાર હેઠળ છે. જોકે હોસ્ટેલમાં રહેતી 100થી વધુ વિદ્યાર્થીનીઓને ફૂડ પોઇઝનિંગની અસર થઈ હોવાનું પ્રાથમિક માહિતી સામે આવી છે.