હાર્દિક પંડ્યા સાથે મતભેદ મામલે શુભમન ગિલે તોડ્યું મૌન, જાણો શું કહ્યું ?

MI vs GT : ગુજરાત ટાઇટન્સના કેપ્ટન શુભમન ગિલે IPL 2025 એલિમિનેટર મેચમાં ટોસ દરમિયાન હાર્દિક પંડ્યા સાથેના મતભેદો અંગેની બધી અટકળોનો અંત લાવી દીધો છે. મુલ્લાનપુરના ન્યૂ પીસીએ સ્ટેડિયમમાં રમાયેલી રોમાંચક મેચમાં હાર્દિકની મુંબઈ ઇન્ડિયન્સે ગિલની ગુજરાત ટાઇટન્સને હરાવ્યું. આ મેચે મેદાનની અંદર જેટલી ચર્ચા કરી તેટલી જ મેદાનની બહાર પણ ચર્ચા થઈ. ચર્ચા ટોસ દરમિયાન જ શરૂ થઈ. જ્યારે હાર્દિકે હાથ મિલાવવા માટે હાથ લંબાવ્યો, ત્યારે ગિલે તેને ઈગ્નોર કર્યો, જોકે પાછળથી એવું લાગ્યું કે ગિલે હાથ મિલાવી દીધો હતો. ટોસ પછી હાર્દિક આખરે હાથ મિલાવ્યા વિના ઇન્ટરવ્યુ માટે રવાના થઈ ગયો. આ પછી મેદાન પર જે બન્યું તેનાથી ચર્ચા વધુ તીવ્ર બની. હવે શુભમન ગિલે હાર્દિક સાથેની તસવીર શેર કરીને મૌન તોડ્યું અને જવાબ આપ્યો છે.

જ્યારે હાર્દિકે બીજી ઇનિંગમાં ગિલને આઉટ કર્યો, ત્યારે તેણે ઉજવણી કરવામાં કોઈ કસર છોડી નહીં. આ ક્ષણ થોડીવારમાં વાયરલ થઈ ગઈ, જેના કારણે GTના પૂર્વ સાથી ખેલાડીઓ વચ્ચે 'ઈગો ક્લેશ'ના દાવાઓ કરવામાં આવ્યા. 

ગિલે અફવા ફેલાવનારાઓને આપ્યો જડબાતોડ જવાબ 

જોકે, ગિલે હવે આ મુદ્દે પોતાનું મૌન તોડ્યું છે. અફવાઓ વચ્ચે, GT કેપ્ટને શનિવારે ઇન્સ્ટાગ્રામ પર પોતાનો અને હાર્દિકનો ફોટો પોસ્ટ કર્યો અને લખ્યું, 'Nothing but love (ઇન્ટરનેટ પર તમે જે જુઓ છો તે બધું માનશો નહીં).' બંને ખેલાડીઓ વચ્ચે જુનો સંબંધ છે. 2022માં ગુજરાત ટાઇટન્સની ડેબ્યૂ સીઝનમાં હાર્દિક અને ગિલ ફ્રેન્ચાઇઝના ટોચના બે ખેલાડીઓ હતા, જેમાં પંડ્યા ટીમનું નેતૃત્વ કરી રહ્યો હતો અને ગિલ ટોપ ઓર્ડરનું નેતૃત્વ કરી રહ્યો હતો. સાથે મળીને આ જોડીએ તેમના પહેલા જ વર્ષમાં GTને ટાઇટલ જીતાડ્યું હતું.

ગિલ અને હાર્દિક સાથે રમ્યા છે

2023માં પણ ગિલ ઓલરાઉન્ડરના નેતૃત્વ હેઠળ રમ્યો અને સિઝનમાં રેકોર્ડ 890 રન બનાવ્યા. પરંતુ 2024માં પરિસ્થિતિ બદલાઈ ગઈ જ્યારે પંડ્યા મુંબઈ ઇન્ડિયન્સમાં ગયો અને ગિલને GTની કેપ્ટનશીપ વારસામાં મળી. ગુરુવારે થયેલા જોરદાર મુકાબલામાં પૂર્વ સાથીઓ મેદાન પર કટ્ટર હરીફ બન્યા. પરંતુ ગિલની પોસ્ટે બધી અફવાઓનો અંત લાવી દીધો અને યાદ અપાવ્યું કે દરેક જ્વલંત ક્ષણ દુશ્મનાવટની નિશાની નથી.