સટ્ટાબાજી એપ્લિકેશન મામલે ફસાયા હરભજન સિંહ, યુવરાજ સિંહ અને સુરેશ રૈના, EDએ શરૂ કરી તપાસ

Illegal Betting Apps : પ્રતિબંધિત સટ્ટાબાજી એપ્લિકેશન્સના પ્રમોશનના કેસમાં એન્ફોર્સમેન્ટ ડિરેક્ટોરેટ (ED)એ દેશના જાણીતા ક્રિકેટરો અને ફિલ્મ હસ્તીઓની પૂછપરછ શરૂ કરી છે. આ કેસમાં ED દ્વારા અત્યાર સુધી જે લોકોને પૂછપરછ માટે બોલાવવામાં આવ્યા છે તેમાં ભૂતપૂર્વ સ્ટાર ઓલરાઉન્ડર યુવરાજ સિંહ, સુરેશ રૈના અને હરભજન સિંહ ઉપરાંત, ફિલ્મ જગતના સોનુ સૂદ અને ઉર્વશી રૌતેલાના નામ સામે આવી રહ્યા છે. 

એવું માનવામાં આવે છે કે ED આ કેસમાં કેટલીક વધુ ફેમસ હસ્તીઓની પણ પૂછપરછ કરશે. EDની આ તપાસ 1xBet, FairPlay, Parimatch અને Lotus365 સહિત પ્રતિબંધિત સટ્ટાબાજી પ્લેટફોર્મના પ્રમોશન સાથે સંબંધિત છે, જે ભારતીય કાયદાનું સ્પષ્ટ ઉલ્લંઘન છે.

મીડિયા અહેવાલ મુજબ, EDના એક વરિષ્ઠ અધિકારીએ જણાવ્યું હતું કે, 'આ સટ્ટાબાજી એપ્લિકેશનો તેમની જાહેરાત અભિયાનમાં 1xbat અને 1xbat Sporting Lines જેવા સરોગેટ નામોનો ઉપયોગ કરે છે. તેમની જાહેરાતોમાં ઘણીવાર QR કોડનો સમાવેશ થાય છે, જે યુઝર્સને સીધી સટ્ટાબાજી સાઇટ્સ પર લઈ જાય છે, જે ભારતીય કાયદાનું સ્પષ્ટ ઉલ્લંઘન છે. કેટલીક સેલિબ્રિટીઓને પહેલાથી જ નોટિસ આપવામાં આવી છે, જ્યારે અન્યને ટૂંક સમયમાં નોટિસ આપવામાં આવે તેવી શક્યતા છે.'

આ પૂછપરછના સંદર્ભમાં, જ્યારે ઉપરોક્ત મીડિયા રિપોર્ટ સાથે સંબંધિત રિપોર્ટરે હરભજન સિંહ, યુવરાજ સિંહ અને સુરેશ રૈનાના મીડિયા મેનેજરો પાસેથી આ બાબતે જવાબ માંગ્યો, ત્યારે તેમણે હાલમાં કંઈ પણ કહેવાનો ઇનકાર કર્યો છે. EDએ કહ્યું કે આ પ્લેટફોર્મ કપટપૂર્ણ અલ્ગોરિધમનો ઉપયોગ કરે છે, જે ભારતીય કાયદાઓનું ઉલ્લંઘન છે અને તેના દ્વારા યુઝર્સને મોટા પ્રમાણમાં પૈસાનું નુકસાન પણ થાય છે, જે એક જુગાર છે.

જ્યારે યુઝર્સ આ એપ્સના પ્રમોશન સાથે સંકળાયેલા આ મોટા નામોને જુએ છે, ત્યારે તેઓ તેમના પર આંધળો વિશ્વાસ કરે છે, જેના કારણે તેમને નાણાકીય નુકસાન થાય છે. એવું કહેવામાં આવી રહ્યું છે કે ED તપાસમાં ઘણી મીડિયા સંસ્થાઓ પણ અહીં આવતી જોવા મળી રહી છે.