હવે આ ફોનમાં નહીં ચાલે Google Chrome, જાણો કારણ અને તમે શું છે તેનો ઉપાય

Google Chrome Support: ગૂગલ ક્રોમ ટૂંક સમયમાં એન્ડ્રોઇડ 8.0 ઓરિયો (Android 8.0 Oreo)અને એન્ડ્રોઇડ 9.0 પાઇ(Android 9.0 Pie)ને સપોર્ટ કરવાનું બંધ કરશે. આ માહિતી ક્રોમ સપોર્ટ મેનેજર એલન ટી દ્વારા આપવામાં આવી છે. આ જાહેરાત ક્રોમના સત્તાવાર સપોર્ટ ફોરમ પર કરવામાં આવી છે. વર્ઝન 139 (જે 5 ઓગસ્ટ, 2025 ના રોજ આવશે) થી ક્રોમ ફક્ત એન્ડ્રોઇડ 10 અથવા તેનાથી ઉપરના વર્ઝન પર જ કામ કરશે. આનો અર્થ એ છે કે જૂના ફોન ધરાવતા વપરાશકર્તાઓ ક્રોમના નવા અપડેટ્સ મેળવી શકશે નહીં. એલને ફોરમમાં લખ્યું છે કે "ક્રોમ 138 ક્રોમનું છેલ્લું વર્ઝન હશે જે એન્ડ્રોઇડ 8.0 (ઓરિયો) અને એન્ડ્રોઇડ 9.0 (પાઇ) ને સપોર્ટ કરશે.

જોકે વપરાશકર્તાઓ તેમના Android 8 અને 9 ઉપકરણો પર Chrome સંસ્કરણ 138 નો ઉપયોગ કરવાનું ચાલુ રાખી શકે છે, તેમને નવી ફીચર, પરફોર્મેન્સમાં સુધાર અથવા કોઈપણ મહત્વપૂર્ણ સુરક્ષા અપડેટ્સ પ્રાપ્ત થશે નહીં. આ બ્રાઉઝર પરફોર્મેન્સને અસર કરી શકે છે અને ડિવાઈસને જોખમો માટે વધુ સંવેદનશીલ બનાવી શકે છે.

ઘણા યુઝર્સઓ તેનો ઉપયોગ કરે છે

તમને જણાવી દઈએ કે એન્ડ્રોઇડ 8.0 સૌપ્રથમ 2017 માં અને એન્ડ્રોઇડ 9.0 2018 માં આવ્યું હતું. આ ઓપરેટિંગ સિસ્ટમનો ઉપયોગ કરતા વપરાશકર્તાઓની સંખ્યા હજુ પણ ઘણી વધારે છે. ગૂગલના એપ્રિલ 2025 ના પ્લેટફોર્મ વિતરણ ડેટા અનુસાર, લગભગ 4% એન્ડ્રોઇડ ડિવાઇસ ઓરિયો પર ચાલે છે, જ્યારે 5.8% પાઇનો ઉપયોગ કરે છે. તેની તુલનામાં, એન્ડ્રોઇડ 10 10% થી વધુ ડિવાઇસમાં છે.

એન્ડ્રોઇડ 8 અને 9 નો ઉપયોગ કરતા વપરાશકર્તાઓનું શું થશે?

જે વપરાશકર્તાઓ હજુ પણ એન્ડ્રોઇડ 8 અથવા 9 નો ઉપયોગ કરી રહ્યા છે તેઓ ક્રોમ 138 નો ઉપયોગ કરવાનું ચાલુ રાખી શકે છે, જોકે સુરક્ષા અપડેટ્સના અભાવે તેની ભલામણ કરવામાં આવતી નથી. બીજો વિકલ્પ ફાયરફોક્સ જેવા બ્રાઉઝર પર સ્વિચ કરવાનો છે, જે એન્ડ્રોઇડ 5.0 અને તેનાથી ઉપરના વર્ઝન પર ચાલતા ઉપકરણોને સપોર્ટ કરે છે. જો કે, કોમ્પિટિબિલિટી બ્રાઉઝર પ્રમાણે બદલાય છે અને કેટલીક જૂની સિસ્ટમો પર યોગ્ય રીતે કામ ન પણ કરી શકે. સૌથી સારો ઉપાય એ છે કે નવું એન્ડ્રોઇડ ડિવાઇસ ખરીદવો. આ ખાતરી કરશે કે તમને ક્રોમ જેવી એપ્સ માટે સતત સપોર્ટ અને સુરક્ષા અપડેટ્સ મળશે.